zindagi mein raqam ki taqseem ka hukum

آپ کے پاس جو رقم ہے اگر آپ اس رقم کو اپنی زندگی میں ہی اپنے بیٹوں اور بیٹیوں درمیان برابر برابر تقسیم کرنا چاہتی ہیں تو کر سکتی ہیں ۔آپ کے وصال کے بعد وہ رقم ان ورثاء کے درمیان ان کے شرعی حصوں کے مطابق تقسیم ہوگی جو آپ کے وصال کے وقت موجود ہوں گے۔

اگر ورثاء یہی ہیں تو کل رقم کو پانچ حصوں میں تقسیم کیا جائے گا جس میں سے دو حصے بیٹے کو ملیں گے اور ایک ایک حصہ بیٹیوں کو ملے گا ، یعنی بیٹے کو بیٹیوں سے دوگنا ملے گا۔

البحر الرائق میں ہے:"يُكْرَهُ تَفْضِيلُ بَعْضِ الْأَوْلَادِ عَلَى الْبَعْضِ فِي الْهِبَةِ حَالَةَ الصِّحَّةِ '':ترجمہ:صحت کی حالت میں اولاد پر ہبہ کر تے ہوئے بعض اولاد کو زیادہ اور بعض کو کم دینا مکروہ ہے۔( البحر الرائق کتاب الھبہ ،باب الھبۃ لطفلۃ،ج:7،ص:288)

ہدایہ میں ہے:ويقسم ماله بين ورثته الموجودين في ذلك الوقت:ترجمہ: اور میت کا مال اس کے ان ورثاء میں تقسیم ہوگا جو اسکی موت کے وقت موجود (زندہ) ہوں۔( الہدایۃ شرح بدایۃ المبتدی کتاب المفقود جلد 2ص 424)

لڑکا اور لڑکی کا حصہ اللہ تعالیٰ نے قرآن مجید میں بیان فرمادیا ہے۔قال اللہ تعالیٰ یُوصِیکُمُ اللَّہُ فِی أَوْلَادِکُمْ لِلذَّکَرِ مِثْلُ حَظِّ الْأُنْثَیَیْنِ : ترجمہ کنز الایمان :۔ اللہ تعالی تمہیں حکم دیتا ہے تمھاری اولاد کے بارے کہ بیٹے کا حصہ دو بیٹیوں برابر ہے۔(النساء : 11)

السراجی فی المیراث ص19میں ہے:ومع الابن للذکر مثل حظ الانثیین : ترجمہ: اور للذکر مثل حظ الانثیین کے تحت بیٹی کو بیٹے کے حصے کا نصف ملے گا۔

واللہ تعالی اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابوالحسنین مفتی وسیم اختر المدنی

تاریخ اجراء:04 صفر المظفر 1440 ھ/15اکتوبر 2018 ء