بچے کے سگے باپ کی جگہ کسی اور کا نام لکھوانا ممنوع ہے کیونکہ قرآن مجید میں بچوں کو ان کے حقیقی باپ کے نام سے پکارنے کا حکم ہے۔پھر سوال کا جواب یہ کہ بلال سمیت آپ کی تمام اولاد آپ کے جائیداد کی وارث ہوگی۔

اولاد کیلئے وراثت کا حکم قرآن وحدیث سے ثابت ہے، اس میں کسی کا خوش حال اور امیر ہونا وراثت کو نہیں روکتا۔حتی کہ خود وارث کے قبضہ سے پہلے زبانی انکار سے بھی اس کا ترکے (جائیداد) سے حصہ ختم نہیں ہوتا کہ وراثت جبری ہے یعنی چاہے نہ چاہے وارث اپنے مورث (جس کی وراثت تقسیم ہونی ہے) کی جائیداد کا مالک ہوتا ہے۔بلکہ اگر کوئی کسی وارث کا حصہ ظلماً روکتا ہے اسکے متعلق حدیث مبارکہ میں سخت وعید آئی کہ اللہ عزوجل آخرت میں جنت سے اس کی میراث ختم فرما دے گا العیاذ باللہ تعالی۔

دلائل جزئیات:

اللہ ربّ العزّت فرماتا ہے: "ادْعُوهُمْ لِآبَائِهِمْ هُوَ أَقْسَطُ عِنْدَ اللہ". ترجمہ: انہیں ان کے باپ کا ہی کا کہہ کر پکارو۔ یہ اللہ کے نزدیک زیادہ ٹھیک ہے۔( الاحزاب:5)

رسول اللہ صلی اللہ تعالیٰ علیہ وآلہ وسلم نے ارشاد فرمايا:" مَنِ ادَّعَى إِلَى غَيْرِ أَبِيهِ، وَهُوَ يَعْلَمُ أَنَّهُ غَيْرُ أَبِيهِ، فَالْجَنَّةُ عَلَيْهِ حَرَامٌ".ترجمہ:جس نے خود کو اپنے باپ کے غیر کی طرف منسوب کیا حالانکہ اسے علم تھا کہ وہ اس کا باپ نہیں ہے تو جنت اس پر حرام ہے۔(صحیح البخاری،8/156،رقم الحدیث:6766، دار طوق النجاة)

قرآن مجید میں اولاد کے میراث کے متعلق ارشاد ہوا:"یُوۡصِیۡکُمُ اللہُ فِیۡۤ اَوْلاَدِکُم لِلذَّکَرِ مِثْلُ حَظِّ الۡاُنۡثَیَیۡنِ ترجمہ: اللہ(عزوجل)تمہیں حکم دیتا ہے تمہاری اولاد کے بارے میں بیٹے کا حصہ دو بیٹیوں کے برابر ہے۔(النساء:11)

حضرت جابر رضی اللہ تعالی عنہ سے روایت ہے کہ رسول اللہ صلی اللہ علیہ وآلہ وسلم نے فرمایا:"إِذَا اسْتَهَلَّ الصَّبِيُّ، صُلِّيَ عَلَيْهِ وَوُرِثَ".ترجمہ:جب بچہ زندہ پیدا ہو تو اس پرنماز بھی پڑھی جائے گی اوراس کو وارث بھی بنایا جائے گا‘‘۔(سنن ابن ماجۃ،کتاب الجنائز، باب ماجاء في الصلاۃ علی الطفل،1/483،رقم الحدیث:1508،دار إحياء الكتب العربية)

مورث کے فوت ہوتے ہی مال وراثت میں وارث کی ملکیت ثابت ہو جانے کے متعلق امام اہلسنت امام احمد رضا خان علیہ رحمۃ الرحمن (المتوفی:1340ھ) فرماتے ہیں:”ارث جبری ہے کہ موت مورث پر ہر وارث خواہ مخواہ اپنے حصہ شرعی کا مالک ہوتا ہے، مانگے خواہ نہ مانگے ، لے یا نہ لے، دینے کا عرف ہو یا نہ ہو ، اگر چہ کتنی ہی مدت ترک کو گزر جائے ، کتنے ہی اشتراک در اشتراک کی نوبت آئے ، اصلاً کوئی بات میراث ثابت کو ساقط نہ کرے گی ، نہ کوئی عرف فرائض اللہ کو تغیر کر سکتا ہے، یہاں تک کہ نہ مانگنا در کنار ، اگر وارث صراحت کہہ دے کہ میں نے اپنا حصہ چھوڑ دیا ، جب بھی اس کی ملک زائل نہ ہوگی ‘‘۔(فتاوی رضویہ،26/113،رضا فاؤنڈیشن لاہور)

کسی وارث کو میراث نہ دینے کے بارے میں حضور صلی اللہ علیہ وآلہ وسلم نے ارشاد فرمایا:" مَنْ فَرَّ مِنْ مِيرَاثِ وَارِثِهِ، قَطَعَ اللَّهُ مِيرَاثَهُ مِنَ الْجَنَّةِ يَوْمَ الْقِيَامَةِ".ترجمہ: جو وارث کو میراث دینے سے بھاگے ،اللہ قیامت کے دن جنت سے اس کی میراث قطع فرما دے گا۔(سنن ابن ماجہ، کتاب الوصایا،باب الحیف فی الوصیۃ،2/902،رقم:2703، دار إحياء الكتب العربية)‎ (شعب الایمان،10/340، رقم:7594، مکتبۃ الرشد)۔

واللہ تعالٰی اعلم بالصواب

کتبـــــــــــــــــــــــــــہ:ابو امیر خسرو سید باسق رضا

الجـــــواب صحــــیـح:ابو الحسنین مفتی وسیم اختر المدنی

تاریخ اجراء:25 ذو القعدہ 1445 ھ/3 جون 2024ء