zindagi mein aulad ke mabain taqseem karke qabza dene ka hukm

برتقدیرِ صدقِ سائل یعنی اگر معاملہ ایسا ہی ہے جیسا ذکر کیا گیا تو اس صورت میں حکم شرعی یہ ہے کہ جو زمین اللہ داد نے اپنی زندگی میں اپنے بیٹوں کو دیکر اس پر تمام بیٹوں کا قبضہ بھی دے دیا وہ زمین خالصتاً بیٹوں کی ہی ملک ہےاور بیٹوں کی وفات کے بعد اصولِ شرع کے مطابق انکے ورثاء میں تقسیم ہوگی۔لہذا جب اللہ داد نے اپنی زندگی میں زمینیں اپنی اولاد کے مابین تقسیم کرکے قبضہ دے دیا تو اب اللہ داد کی وفات کے بعد انکے بیٹوں کا یہ قول درست نہیں کہ عاشق حسین کی اولاد ، اللہ داد کی وراثت سے حق نہیں رکھتی بلکہ جو حصہءِ زمین عاشق حسین کو انکے والد نے زندگی میں دیکر قبضہ دیدیا تھا وہ ان کی ہی ملک ہے اور اب عاشق حسین کے اولاد کی ملکیت ہے اس میں عاشق حسین کے بھائیوں کاشرعاً کوئی حصہ نہیں۔

تفصیلِ مسئلہ:

کسی بھی شخص کا زندگی میں اپنے ورثا کے مابین جائیداد تقسیم کرنا جائز ہے البتہ یہ تقسیم ازقبیلِ وراثت نہیں بلکہ از قبیلِ ھبہ ہے لہذا اگر بعد از تقسیم الگ الگ کرکے قبضہ دے دیا جائے تو یہ ھبہ تام ہوجاتا ہے اور وہ جائیداد ورثاء کی ملکیت ہوجاتی ہے اور بعد وفاتِ ورثاء انکے ورثاء کے مابین شرعی حصص کے اعتبار سے تقسیم ہوگی۔

ھبہ سے متعلق تنویرالابصار میں ہے: وَ شَرَائِطُ صِحَّتِهَا (فِي الْمَوْهُوبِ أَنْ يَكُونَ مَقْبُوضًا غَيْرَ مَشَاعٍ مُمَيَّزًا غَيْرَ مَشْغُولٍ)ترجمہ:اور ھبہ (گفٹ)کے موہوب ( گفٹ کی گئی چیز)میں صحیح ہونے کی شرائط یہ ہیں کہ وہ چیز قبضہ میں ہو، اور غیر مشاع ہو (یعنی ایسی مشترک چیز نہ ہو جس میں شریکوں کے حصے ممتاز نہ ہوں)اور ممیز ہو(یعنی جدا اور نمایاں ہو) اور غیر مشغول ہو(یعنی اس میں کسی اور کا کوئی حق متعلق نہ ہو)۔( تنویرالابصار مع الدرالمختار کتاب الھبہ جلد 5ص688)

اسی میں ہے:تتم الھبۃ بالقبض الکامل۔ترجمہ:مکمل قبضہ کے بعد ھبہ تام ہوتاہے ۔( تنویر الابصار مع الدر المختار کتاب الھبہ جلد 5 ص 692)

عالمگیریہ میں ہے : لایثبت الملک للموہوب لہ قبل القبض ۔ترجمہ:قبضہ سےقبل موہوب لہ کی ملکیت ثابت نہ ہوگی۔( فتاوٰی ہندیہ کتاب الھبۃ الباب الاول نورانی کتب خانہ پشاور جلد4 ص 374)

الدر المختار مع رد المحتار میں ہے:والمیم موت احد المتعاقدین بعد التسلیم فلو قبلہ بطل۔ترجمہ:''م'' سے مراد فریقین میں سے ایک کی موت بعد قبضہ ہے اور اگر قبضہ سے قبل موت ہو تو ہبہ باطل ہے۔(درمختار کتاب الھبۃ باب الرجوع فی الھبۃ ،جلد 5ص701)

ہدایہ میں قبضہ کی شرط کی علت یوں بیان کی گئی :والقبض لا بد منه لثبوت الملك لأنه عقد تبرع، وفي إثبات الملك قبل القبض إلزام المتبرع شيئا لم يتبرع به، وهو التسليم فلا يصح۔ترجمہ: ھبہ میں ملکیت کے ثبوت کے لیے قبضہ ضروری ہے کیونکہ یہ مفت عطیہ کا عقد ہے ، جبکہ قبضہ سے قبل موہوب لہ کی ملکیت ثابت کرنا تبرع کرنے والے پر ایسی چیز کو لازم کرنا جس کا ابھی اس نے تبرع نہیں کیا اور یہ قبضہ دینا تبرع ہے تو قبل قبضہ درست نہ ہوا۔(الہدایہ شرح بدایۃ المبتدی کتاب الھبہ جلد 3 ص 222)

سیدی اعلٰی حضرت قبضہ کاملہ کی وضاحت یوں فرماتے ہیں : قبضہ کاملہ کے یہ معنی کہ وہ جائیداد یا تو وقت ہبہ ہی مشاع نہ ہو یعنی کسی اور شخص کی ملک سے مخلوط نہ ہو جیسے دیہات میں بغیر پٹہ بانٹ کے کچھ بسوے یا مکانات میں بغیر تقسیم جدائی کے کچھ سہام۔ اور واہب اس تمام کو موہوب لہ کے قبضہ میں دے دے، یا مشاع ہو تو اس قابل نہ ہو کہ اسے دوسرے کی ملک سے جدا ممتاز کرلیں تو قابل انتفاع رہے جیسے ایک چھوٹی سی دکان دو شخصوں میں مشترک کہ آدھی الگ کرتے ہیں تو بیکار ہوئی جاتی ہے ایسی چیز کا بلا تقسیم قبضہ دلادینا بھی کافی وکامل سمجھا جاتاہے، یا مشاع قابل تقسیم بھی ہو تو واہب اپنی زندگی میں جدا ومنقسم کرکے قبضہ دے دے کہ اب مشاع نہ رہی۔ یہ تینوں صورتیں قبضہ کاملہ کی ہیں۔(فتاویٰ رضویہ کتاب الھبہ جلد 19 ص 221 رضا فاؤنڈیشن لاہور)۔

واللہ تعالٰی اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابو الحسنین مفتی وسیم اختر المدنی

تاریخ اجراء:27 ربیع الاول 1447ھ/ 20 ستمبر2025 ء