صورتِ مستفسرہ میں جماعت کا ایسا عمل کرنا درست ہوگا ۔

مسئلے کی تفصیل یہ ہے کہ زکوٰۃ کی ادائیگی کے لیے تملیک شرط ہے ۔مستحقین کو مالک بنائے بغیر زکوٰۃ ادا نہیں ہوتی ۔اور یہاں مستحقین کی جانب سے وکیل جب قبضہ کرلے گا تو تملیک کا عمل مکمل ہوجائےگا کیونکہ وکیل کا قبضہ مؤکل کا قبضہ ہوتا ہے ۔پھر وکیل کا بینک اکاؤنٹ میں رقم کا آجانا قبضہ شمار ہوگا کہ یہ بھی قبضے کی ایک صورت ہے۔ پھر مستحقین کی جانب سےادارے کو مالک بنانے کی وکالت لے کر ان پر یا دیگر مستحقین پر خرچ کرنا بھی درست ہے،کہ یہ اب ان مستحقین کی رقم ہے وہ جسے چاہیں اس رقم کا مالک کردیں۔

زکوٰۃ کے لیے مالک بنا نا شرط ہے اس کی بابت درمختار میں ہے:وَیُشْتَرَطُ أَنْ یَکُونَ الصَّرْفُ (تَمْلِیکًا) لَا إبَاحَۃً کَمَا مَرَّترجمہ: اور زکوۃ میں مالک بنانا شرط ہے ،اباحت (استفادہ کی اجازت دینا) کافی نہیں ہے جیسا کہ گزرا۔( تنویرالابصار مع الدرالمختار باب مصرف الزکوۃ جلد 2ص344)

اعلیٰ حضرت امام اہلسنت مجدددین وملت الشاہ امام احمد رضا خان علیہ رحمۃ الرحمٰن فرماتے ہیں: زکوٰۃ کا رکن تملیکِ فقیر ہے جس کام میں فقیر کی تملیک نہ ہوکیسا ہی کارِحسن ہو جیسے تعمیرِ مسجد یا تکفینِ میّت یا تنخواہِ مدرسانِ علمِ دین، اس سے زکوٰۃ نہیں ادا ہوسکتی۔(فتاوی رضویہ ،جلد 10،صفحہ 270،رضا فاؤنڈیشن لاہور)

مستحق زکوٰۃ جب کسی کو زکوٰۃ پر قبضہ کرنے کا وکیل بنائے تو وکیل کا قبضہ مؤکل کا قبضہ ہوگا اسکی بابت فتاوٰی شامی میں ہے: يوكل المديون خادم الدائن بقبض الزكاة ثم بقضاء دينه، فبقبض الوكيل صار ملكا للموكلترجمہ:مدیون دائن کے خادم کو زکوٰۃ پر قبضہ کرنے کا وکیل بنائےپھر اپنا قرض ادا کرنے کا وکیل بنائے تو وکیل کے قبضہ کرنے کے سبب زکوٰۃ مؤکل کی ملک ہوجائے گی۔(ردالمحتار علی الدرالمختار،جلد:2،ص:271،دارالفکر بیروت)

بینک اکاؤنٹ میں موجود رقم قبضہ شمار ہوتی ہے جیسا کہ اعلیٰ حضرت امام اہلسنت مجدددین وملت الشاہ امام احمد رضا خان علیہ رحمۃ الرحمٰن فرماتے ہیں: وہ (رقم)جب تک بینک میں ہے اپنے قبضے میں سمجھا جائے گا۔(فتاوی رضویہ ،جلد:10،ص:142،رضا فاؤنڈیشن لاہور)

واللہ تعالٰی اعلم بالصواب

کتبـــــــــــــــــــــــــــہ: محمد احمد امین قادری نوری

الجواب الصحیح : ابو الحسنین مفتی وسیم اختر المدنی

تاریخ اجراء: 26ذوالقعدہ1442 ھ/07جولائی 2021 ء