Tum meri taraf se farigh ho kehnay se talaq ka hukam

صورت مستفسرہ میں مذکورہ الفاظ سے عورت کا دو طلاق رجعی واقع ہوچکی ، پھر جب عدت میں رجوع نہ ہو حتٰی کہ عدت گزر گئی تو اس صورت میں عورت نکاح سے نکل گئی۔ اگر شوہر نے ان دو طلاقوں سے قبل کوئی طلاق نہیں دی تھی اور اب اگر باہمی رضامندی سے دونوں رجوع کرنا چاہتے ہیں تو اس صورت میں نئے حق مہراور نئے گواہوں کے ساتھ نکاح کرنا لازم ہے، لیکن آئندہ فقط ایک طلاق کا حق باقی رہے گا جسکے بعد عورت حرمتِ مغلظہ کیساتھ حرام ہوجائے گی ۔

تم میری طرف سے فارغ ہو اور اس جیسے الفاظ فی زمانہ صریح ہیں اس سلسلے میں فقیہ العصر ، تاج الفقہاء مفتی وسیم اختر المدنی اپنے مبسوط فتوٰی بنام ''طلاق کےالفاظ صریح وکنایہ پرایک مبسوط فتوى'' میں فرماتے ہیں:ہمارے نزدیک اردو زبان کے الفاظ '' میں نے تمہیں فارغ کیا '' یا ''تم میری طرف سے فارغ ہو'' کی وضع طلاق کے لئے نہیں ہے اس لئے فقہاء کرام نے انہیں کنایہ شمار فرمایا تھا۔لیکن بحکمِ مقدمہ خامسہ پاکستان کے اکثر شہروں میں یہ الفاظ طلاق کے لئے کثیر الاستعمال ہونے اور عرف و عادت کی وجہ سے ملحق بالصریح ہیں ۔کیونکہ آج کل جب بھی کوئی شخص یہ الفاظ بولتا ہے تو بغیر کسی قرینہ خارجیہ کے متبادر الی الفہم طلاق کے معنٰی ہی ہوتے ہیں ۔لہذا بحکمِ مقدمہ اولٰی ان الفاظ سے ہر حال میں بلانیت طلاق واقع ہوجائے گی۔اور ایک سے زائد بار بولنے کی صورت میں پہلے والی دوسری کو لاحق ہو گی۔اور تین بار بولا تو طلاق بائنہ مغلظہ وقوع پذیر ہوگی۔(ماخوذ از وسیم الفتاوٰی، حوالہ نمبر 7382 غیر مطبوعہ)

عدت گزر جائے تو نیا نکاح ضروری ہے ،جیساکہ بدائع الصنائع میں ہے : أنها تحل في كل واحدة منهما بنكاح جديد من غير التزوج بزوج آخرترجمہ:طلاق رجعی(میں عدت گزرنے کے بعد) اور طلاق بائن میں سے ہر ایک میں عورت دوسرے شوہر سے شادی کئے بغیر محض نکاح جدید سے ہی سابقہ شوہر کے لیے حلال ہوجائے گی۔( بدائع الصنائع کتاب النکاح فصل فی الکنایۃ فی الطلاق جلد 3 ص 108 )

سیدی اعلٰی حضرت فرماتے ہیں: اگر پہلے کبھی اسے کوئی طلاق نہ د ی تھی تو عورت کی مرضی سے اس سے دوبارہ جدید مہر کے ساتھ نکاح کرسکتا ہے۔(فتاویٰ رضویہ، کتاب الطلاق، جلد 12 ص 571)واللہ تعالٰی اعلم بالصواب