masla wirasat panch bete teen betiyan

پگڑی کی خرید و فروخت کے بارے میں موجودہ دور کے علماءکے دو گروہ ہیں، بعض عدمِ جواز کے قائل ہیں اور بعض جواز کے۔ عدمِ جواز کے قائلین کی دلیل یہ ہے کہ پگڑی ''حقِ قبضہ'' کی بیع کا نام ہے اور ''حق ''مال نہیں ہے ، جبکہ بیع کے لئے مال ہونا لازم ہےلہذا اس دکان یا مکان کے بجائے فقط اس پر حقِ قبضہ کی بیع ہونے کی بناء پر ناجائز ہے ۔

جبکہ دیگر مفتیان بلکہ خود ہمارے نزدیک اسکی بیع جائز ہے ،(جس کی تفصیل ہمارے دیگر فتاوٰی میں موجود ہے۔) لہذا جس نے بھی دوکان یا مکان پگڑی

پر خریدا وہ اسکا مالک ہوجائے گا اور بعد از وصال وہ مکان اسکے ورثاء کے مابین انکے شرعی حصص کے مطابق تقسیم ہوگی۔کسی بھی وارث کا اکیلے اس پر دعوٰی کرنا یا اپنے نام کرنا ہرگز جائز نہیں ہے، لہذا یہاں بھی یہ مکان ورثاء کے مابین انکے شرعی حصص کے مطابق تقسیم ہوگا جسکی تفصیل درج ذیل ہے:

امور متقدمہ علی الارث(یعنی میت کے کفن دفن کے اخراجات،اگر اس پر قرضہ ہو تو اسکی ادائیگی ،اگر اس نے کسی غیر وارث کے لئے کوئی وصیت کی تو ایک ثلث سے اس وصیت کے نفاذ)کے بعد کل مال وراثت کو 52حصوں میں تقسیم کیا جائے گا ،ہر وارث کا حصہ درج ذیل ہے۔

زینب:4 ، مریم :4، ابراہیم:8، حسن:8، عباس:8، اکبر:8 احمد:8، شہزاد:2، شازیہ:1، نادیہ:1

وراثت کی مذکورہ تقسیم اللہ تعالٰی کے مقرر کردہ حصوں کے مطابق ہے: لڑکے لڑکیوں کے بارے میں ارشاد فرمایا:یُوصِیکُمُ اللَّہُ فِی أَوْلَادِکُمْ لِلذَّکَرِ مِثْلُ حَظِّ الْأُنْثَیَیْنِ۔ترجمہ کنز الایمان : اللہ تعالی تمہیں حکم دیتا ہے تمھاری اولاد کے بارے کہ بیٹے کا حصہ دو بیٹیوں برابر ہے۔(النساء : آیت نمبر 10)

السراجی فی المیراث ص19میں ہے:ومع الابن للذکر مثل حظ الانثیین۔ترجمہ:اور للذکر مثل حظ الانثیین کے تحت بیٹی کو بیٹے کے حصے کا نصف ملے گا۔

فائدہ : رقم تقسیم کرنے کا طریقہ یہ ہے کہ پگڑی کے مکان کی کل ویلیو کو مبلغ یعنی 52 پرتقسیم کردیں جو جواب آئے اسکومحفوظ کرلیں بعد ازاں اس کو ہر ایک کے حصے میں ضرب دے دیں،حاصل ضرب ہر ایک کا رقم کی صورت میں حصہ ہوگا۔

واللہ تعالٰی اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابو الحسنین مفتی وسیم اختر المدنی

تاریخ اجراء: ربیع الثانی 1446ھ/ 16 اکتوبر 2024 ء