مذکورہ بالا شرائط کے ساتھ اقساط میں بیع کرنا ناجائز ہے ، کیوں کہ مذکورہ صورت میں درخواست واپس لینے کی وجہ سے 25000یا 25 فی صد رقم بطور جرمانہ لازم کیا جارہا ہے ، اور صحیح قول کے مطابق مالی جرمانہ عائد کرنا ناجائز ہے ،الدرالمختار مع رد المحتار میں ہے: (لَا بِأَخْذِ مَالٍ فِي الْمَذْهَبِ) بَحْرٌ.ترجمہ:صحیح مذہب میں مالی جرمانہ لینا جائز نہیں ہے۔( الدرالمختار مع رد المحتار باب التعزیر جلد 4 ص 68)

البحرالرائق میں ہے:وَالْحَاصِلُ أَنَّ الْمَذْهَبَ عَدَمُ التَّعْزِيرِ بِأَخْذِ الْمَالِ ترجمہ:اور خلاصہ یہ ہے کہ صحیح مذہب میں مالی جرمانہ سے سزا دینا جائز نہیں ہے۔(البحر الرائق شرح کنزالدقائق فصل فی التعزیرجلد 5 ص44)

اور پھر اس میں یہ بھی شرط ہے کہ تین ماہ کی قسط نہ ادا کرنے کی صورت میں کمپنی کا انسپیکٹر مال واپس اور ضبط کا مجاز ہوگا، اورچند ماہ اقساط کی ادائیگی کے بعد لگاتار تین ماہ ادا نہ کی پھر مال ضبط کرلیا جائے گا اور اس کی ادا کردہ رقم واپس نہیں کی جائے گی اسی طرح اگر وہ ابتدائی تین ماہ قسط کی رقم ادا نہ کرسکا تو انکو ایڈوانس کی مد میں لی گئی بیس فیصد رقم واپس نہیں کی جائے گی تو یہ بھی ناجائز و حرام ہے،یہ لوگوں کے مال کو ناجائز اور باطل طریقے سے کھانا ہے۔قال اللہ تعالٰی وَلَا تَأْكُلُوا أَمْوَالَكُمْ بَيْنَكُمْ بِالْبَاطِلِ ترجمہ کنزالایمان: اور آپس میں ایک دوسرے کا مال ناحق نہ کھاؤ۔(البقرۃ:188)

دوسری جگہ ارشاد فرمایا:يَا أَيُّهَا الَّذِينَ آمَنُوا لَا تَأْكُلُوا أَمْوَالَكُمْ بَيْنَكُمْ بِالْبَاطِلِ إِلَّا أَنْ تَكُونَ تِجَارَةً عَنْ تَرَاضٍ مِنْكُمْ وَلَا تَقْتُلُوا أَنْفُسَكُمْ إِنَّ اللَّهَ كَانَ بِكُمْ رَحِيمًا (29) وَمَنْ يَفْعَلْ ذَلِكَ عُدْوَانًا وَظُلْمًا فَسَوْفَ نُصْلِيهِ نَارًا وَكَانَ ذَلِكَ عَلَى اللَّهِ يَسِيرًا (30)ترجمہ کنزالایمان: اے ایمان والو آپس میں ایک دوسرے کے مال ناحق نہ کھاؤ ،مگر یہ کہ کوئی سودا تمہاری باہمی رضا مندی کا ہو ،اوراپنی جانیں قتل نہ کرو ،بے شک اللہ تم پر مہربان ہے،اورجو ظلم وزیادتی سے ایسا کرے گا تو عنقریب ہم اُسے آگ میں داخل کریں گے اور یہ اللہ کو آسان ہے۔(النساء:29،30)

واللہ تعالٰی اعلم بالصواب

کتبــــــــــــــــــہ:محمد زوہیب رضا قادری

الجواب الصحیح : ابو الحسنین مفتی وسیم اختر المدنی

تاریخ اجراء :15 رمضان المبارک 1440 ھ/21 مئی 2019 ء