masafat e safar aur qasr ke aghaz mein farq

مسافتِ سفر کا اعتبار اس جگہ سے ہوگا جہاں سے آدمی سفر شروع کرتا ہے، یعنی اپنے گھر سے، اس خاص مقام تک جہاں جانے کا ارادہ ہے؛ البتہ سفر کے احکام مثلاً قصر وغیرہ اسی وقت جاری ہوں گے جب وہ اپنے شہر کی آبادی سے نکل جائے۔

اس مسئلے میں دو الگ الگ باتیں ہیں جنہیں آپس میں ملا دینے سے غلط فہمی پیدا ہوتی ہے: ایک یہ کہ آدمی پر سفر کے احکام کب سے جاری ہوں گے، اور دوسری یہ کہ اس کا سفر شرعی سفر بنتا بھی ہے یا نہیں، یعنی مسافت کتنی ہے۔ پہلی بات کا تعلق اپنی آبادی سے نکلنے سے ہے، اور دوسری کا تعلق تین دن کی مسافت کے قصد سے؛ اور فقہائے کرام نے ان دونوں کو الگ الگ شرط کے طور پر ذکر فرمایا ہے۔

چنانچہ ہدایہ میں شرعی سفر کی تعریف یوں ہے: "السفر الذي يتغير به الأحكام أن يقصد الإنسان مسيرة ثلاثة أيام ولياليها". ترجمہ: وہ سفر جس سے احکام بدلتے ہیں، یہ ہے کہ انسان تین دن اور تین رات کی مسافت کا ارادہ کرے۔ (الہدایۃ، کتاب الصلاۃ، باب صلاۃ المسافر، 1/80، دار احیاء التراث العربی بیروت)

اور در مختار میں ہے کہ مسافر وہ ہے جو "خرج من عمارة موضع إقامته"، یعنی اپنی جائے اقامت کی آبادی سے نکل جائے۔ (الدر المختار مع رد المحتار، کتاب الصلاۃ، باب صلاۃ المسافر، 2/121، دار الفکر بیروت)

اور علامہ ابن نجیم مصری رحمۃ اللہ علیہ (المتوفی: 970ھ) نے آبادی سے نکلنے کی شرط بیان کرنے کے بعد فرمایا: "وأما الثاني فهو أن يقصد مسيرة ثلاثة أيام، فلو طاف الدنيا من غير قصد إلى قطع مسيرة ثلاثة أيام لا يترخص". ترجمہ: رہی دوسری شرط، تو وہ یہ ہے کہ تین دن کی مسافت کا ارادہ کرے، لہذا اگر کوئی تین دن کی مسافت طے کرنے کے ارادے کے بغیر ساری دنیا گھوم آئے تو اسے رخصت حاصل نہ ہوگی۔ (البحر الرائق، کتاب الصلاۃ، باب صلاۃ المسافر، 2/139، دار الکتاب الاسلامی بیروت)

معلوم ہوا کہ آبادی سے نکلنا سفر کے احکام شروع ہونے کی شرط ہے، مسافت ناپنے کا پیمانہ نہیں؛ اور مسافت کا مدار اس سفر کے قصد پر ہے جو آدمی کرتا ہے، اور آدمی کا سفر اپنے گھر سے شروع ہوتا ہے، شہر کی حد سے نہیں، کہ گھر سے نکل کر شہر کی حد تک کا راستہ بھی اسی سفر کا حصہ ہے جو اس نے اسی قصد سے طے کیا، اور اس کی مشقت بھی اسے اٹھانی پڑتی ہے؛ اس حصے میں قصر کا حکم نہ ہونا اس لیے نہیں کہ یہ سفر میں شامل نہیں، بلکہ اس لیے کہ شریعت نے رخصت کا آغاز آبادی سے نکلنے پر رکھا ہے۔ اسی لیے فقہائے کرام مسافت کا حساب سفر شروع کرنے کے وقت سے کرتے ہیں، نہ کہ احکام جاری ہونے کے وقت سے؛ چنانچہ بحر الرائق میں ہے: "وعلى اعتبار القصد تفرع في صبي ونصراني خرجا قاصدين مسيرة ثلاثة أيام ففي أثنائها بلغ الصبي وأسلم الكافر يقصر الذي أسلم فيما بقي ويتم الذي بلغ لعدم صحة القصد والنية من الصبي حين أنشأ السفر بخلاف النصراني والباقي بعد صحة النية أقل من ثلاثة أيام". ترجمہ: قصد کے معتبر ہونے ہی پر یہ مسئلہ متفرع ہوا کہ ایک بچہ اور ایک نصرانی تین دن کی مسافت کے ارادے سے نکلے، پھر راستے میں بچہ بالغ ہو گیا اور کافر مسلمان ہو گیا، تو جو مسلمان ہوا وہ باقی سفر میں قصر کرے گا اور جو بالغ ہوا وہ پوری نماز پڑھے گا؛ کیونکہ سفر شروع کرتے وقت بچے کا قصد و نیت درست نہ تھی، بخلاف نصرانی کے، اور صحیح نیت کے بعد باقی مسافت تین دن سے کم ہے۔ (البحر الرائق، کتاب الصلاۃ، باب صلاۃ المسافر، 2/139، دار الکتاب الاسلامی بیروت) دیکھیے! نصرانی پر قصر کا حکم مسلمان ہونے کے بعد جاری ہوا، مگر مسافت کا حساب اس جگہ سے کیا گیا جہاں سے اس نے سفر شروع کیا تھا؛ اسی طرح یہاں بھی قصر کا حکم آبادی سے نکلنے کے بعد جاری ہوگا، مگر مسافت کا حساب اسی جگہ سے ہوگا جہاں سے سفر شروع ہوا، یعنی گھر سے۔

یہی بات امام اہلسنت امام احمد رضا خان علیہ رحمۃ الرحمن (المتوفی: 1340ھ) کے کلام سے ظاہر ہے، چنانچہ آپ نے مسافت کا ذکر جائے اقامت سے مقصود جگہ تک فرمایا: ’’ہاں اگر جانے خواہ آنے کسی محل اقامت بالخصوص ایسی جگہ کے عزم پر چلیں جو وہاں سے مدّت سفر پر ہو تو سفر متحقق اور قصر واجب ہوگا‘‘۔ (فتاوی رضویہ، 8/241-242، رضا فاؤنڈیشن لاہور) نیز فرمایا: ’’آدمی اگر کسی مقام اقامت سے خاص ایسی جگہ کے قصد پر چلے جو وہاں سے تین منزل ہو تو اس کے مسافر ہونے میں کلام نہیں‘‘۔ (فتاوی رضویہ، 8/247، رضا فاؤنڈیشن لاہور)

اور ایک مقام پر جھوٹی نیت کا ذکر کرتے ہوئے فرمایا: ’’دل میں عزم دو ہی منزل کا ہے اور گھر سے تین منزل کا ارادہ کر لیا کہ آبادی سے نکل کر راہ میں قصر کی اجازت مل جائے ہرگز اجازت نہ ہوگی کہ یہ نیت نہیں‘‘۔ (فتاوی رضویہ، 8/261، رضا فاؤنڈیشن لاہور) اس عبارت میں ایک طرف مسافت کو ’’گھر سے تین منزل‘‘ فرمایا، اور دوسری طرف قصر کی اجازت کو ’’آبادی سے نکل کر‘‘ سے متعلق فرمایا، جس سے یہی دونوں باتیں الگ الگ ظاہر ہیں۔

رہا یہ کہنا کہ مسافت دو شہروں کی حدود کا درمیانی فاصلہ ہے، تو اس پر جو دلائل پیش کیے جاتے ہیں، مثلاً نبی کریم صلی اللہ علیہ وآلہ وسلم کا مدینہ منورہ میں ظہر کی چار رکعتیں اور ذو الحلیفہ میں عصر کی دو رکعتیں ادا فرمانا، یا آبادی سے نکلنے کے بعد قصر شروع ہونے کی عبارات، وہ سب اس بارے میں ہیں کہ سفر کے احکام کب شروع ہوتے ہیں، نہ کہ اس بارے میں کہ مسافت کہاں سے ناپی جائے؛ اور ان سے مسافت کا حکم نکالنا دو الگ مسئلوں کو ملا دینا ہے۔ نیز اس قول پر یہ لازم آتا ہے کہ بڑے شہروں میں رہنے والا (جیساکہ کراچی)، جس کا گھر شہر کی حد سے کئی کلومیٹر اندر ہو، گھر سے سو کلومیٹر سے زیادہ کا سفر کرے، پھر بھی محض اس لیے مسافر نہ ہو کہ دونوں شہروں کی حدود کا فاصلہ 92 کلومیٹر سے کم ہے، حالانکہ اس نے سفر کی پوری مسافت اسی قصد سے طے کی ہے۔

خلاصہ یہ کہ جو شخص اپنے گھر سے کسی ایسی خاص جگہ کے ارادے سے نکلے جو اس کے گھر سے تقریباً 92 کلومیٹر یا اس سے زیادہ ہو، وہ شرعی مسافر ہے؛ مگر قصر وہ اپنے شہر کی آبادی سے، جس طرف سے نکل رہا ہے اس طرف سے، نکلنے کے بعد ہی کرے گا، اور واپسی پر اپنے شہر کی آبادی میں داخل ہوتے ہی پوری نماز پڑھے گا، اگرچہ ابھی گھر نہ پہنچا ہو۔

واللہ تعالی اعلم بالصواب