سوال
شوہر کا بیان
میرا اور میری بیوی کا جھگڑا ہوا تو میں نے غصہ میں کہا کہ میں تمہیں طلاق دے دونگا اسکے بعد ہم گھر سے چلا گیا اور تقریباً ڈیڑھ ماہ سے دوست کے گھر رہ رہا ہوں کیا ان الفاظ سے طلاق ہوجاتی ہے یانہیں نیز یہ کہ ہم اب اپنا گھر بسانا چاہتے ہیں اسکا کیا طریقہ ہے۔
بیوی کا بیان بھی شوہر کے بیان کے مطابق ہے۔
سائل:محمد عمیر : کراچی
بِسْمِ اللہِ الرَّحْمٰنِ الرَّحِيْمِ
اَلْجَوَابُ بِعَوْنِ الْمَلِکِ الْوَھَّابِ اَللّٰھُمَّ ھِدَايَةَ الْحَقِّ وَ الصَّوَابِ
اگر معاملہ ایسا ہی ہے جیسا سوال میں ذکر کیا گیا اور شوہر نے بعینہ یہی الفاظ کہے تھے تو حکمِ شرع یہ ہے کہ تو ان الفاظ سے طلاق واقع نہیں ہوئی کیونکہ یہ الفاظ مستقبل میں وعدہ طلاق پر دلالت کرتے ہیں ،اور وعدہ طلاق ،طلاق نہیں ہوتی ۔فتح القدیر باب ایقاع الطلاق جلد 4ص7میں ہے:وَلَا یَقَع بِأُطَلِّقُک إلَّا إذَا غَلَبَ فِی الْحَالِ۔ترجمہ : اور میں تجھے طلاق دے دونگا سے طلاق واقع نہیں ہوگی لیکن جبکہ حال میں اسکا استعمال غالب ہو تواس سے طلاق ہو جائے گی۔
سیدی اعلٰی حضرت فتاوٰی رضویہ میں ایک سوال کے جواب میں فرماتے ہیں :طلاق کے وعدہ سے طلاق نہیں ہوتی۔(فتاوٰی رضویہ، کتاب الطلاق ،جلد 13 ص 159)
لہذا دونوں حسبِ سابق میاں بیوی کی مثل رہ سکتے ہیں، اگر پہلے کبھی طلاق نہیں دی تو شوہر کو تین طلاقوں کا حق باقی ہے۔
واللہ تعالٰی اعلم بالصواب
کتبـــــــــــــــــــــــــــہ:محمد زوہیب رضا قادری
الجـــــواب صحــــیـح:ابو الحسنین مفتی وسیم اختر المدنی
تاریخ اجراء:04 رجب المرجب 1445ھ/ 16 جنوری 2024 ء