Karobar Mein Lagai Raqam Ka Mutalba

اگر کنٹومنٹ بورڈ سے اصل رقم اور منافع دونوں مل گئے تو یہ تمام رقم منظور احمد پر دین ہےجسکی ادائیگی ان پر لازم تھی اسکے باوجود منظور احمد نے وعدہ کے مطابق رقم نہ دی حتٰی کہ انکا انتقال ہوگیا تواب یہ رقم انکے کل ترکہ سے ادا کی جائے گی۔

اس صورت میں اگر انکے داماد اور بیٹی نے 3 لاکھ 75 ہزار دے دیئے اور اس رقم کی ادائیگی کے وقت اختر عالم سے یہ کہہ کر'' پہلے قبول کریں کہ میں مزید کوئی کلیم نہیں کرونگا، ورنہ آپکو کوئی رقم نہیں دی جائے گی'' پیپر پر دستخط لے لئے تو بھی ترکہ سے بقیہ رقم دینا لازم ہے وگرنہ سخت گنا ہ گار ہونگے اور اس دَین کے بارے میں بروزِ حشر منظور احمد سے باز پُرس کی جائے گی۔

کیونکہ اس طرح دستخط کرنا رضامندی کی قبیل سے نہیں ہوتا بلکہ دھمکی کے سبب ہوتا جسکی وجہ سے فریق مخالف کو موجودہ رقم سے بھی محروم ہونے کا اندیشہ ہوتا ہے عموماً اس طرح کے معاملات میں وہ فریق موجودہ رقم حاصل کرنے کا یہی حیلہ اختیار کرتا ہے کہ بادلِ نخواستہ دستخط کردیتا ہے تاکہ کم از کم یہ رقم مل جائے،سو معلوم ہوا کہ اس دستخط کے ذریعے بقیہ دَین کی معافی بغیر رضامندی کے ہوتی ہے جسکا کوئی اعتبار نہیں لہذا اس فریق کے ذمے بقیہ رقم لازم و باقی رہتی ہے۔البتہ اس معاملے میں اتنا ضرور ہے کہ فریقِ مخالف اس بات پر حلف دے کہ میں نے دستخط اسی نیت سے کئے تھے کہ یہ مل جائے اور بقیہ بعد میں حاصل کروں گا تو اسکی بات اس حلف کے ساتھ معتبر مانی جائے گی۔

مشکوۃ المصابیح میں ہے:"قال رسول الله صلّى الله عليه وسلّم : ألا تظلموا ألا لا يحلّ مال امرئ إلاّ بطيب نفس منه''۔ ترجمه:الله كے رسول صلي الله عليه وسلم نے ارشاد فرمايا:خبردار ہوجاؤ! ظلم نہ کرو،خبردار ہوجاؤ! کسی آدمی کا مال اسی رضامندی کے بغیر حلال نہیں ہے۔(مشکوۃ المصابیح، کتاب البیوع، باب الغصب والعاریۃ، حدیث نمبر: 2956)

کتب فقہ میں عورت کے مہر کے بارے میں یہی منقول کہ بلارضامعاف نہ ہوگا حالانکہ وہ بھی دین ہی ہے چناچہ ہندیہ میں ہے: ولا بد في صحة حطها من الرضا حتى لو كانت مكرهة لم يصح۔ ترجمہ:مہر کی معافی رضامندی کے ساتھ درست ہے حتٰی کہ اگر عورت کو مجبور کیا گیا تو یہ معافی درست نہیں۔(فتاوٰی ہندیہ،ج 1 ص 313 )

مبسوط سرخسی میں ہے: لو أكره على الحط لم يصح حطه لعدم تمام الرضا۔ ترجمہ:اگر پیسے معاف کرنے پر اکراہ کیا تو رضامندی نہ ہونے کے سبب معاف کرنا درست نہیں۔(المبسوط،جلد 30 ص 134 )

الموسوعۃ الفقہیہ میں ہے: لا يصح أيضاً مع الإكراه إبراء الدائن مديونه ۔ترجمہ:اکراہ کے ساتھ دائن کا مدیون کو بری کرنا درست نہیں۔(المادۃ:198 جلد 6 ص 176)

لیکن اگر کنٹومنٹ بورڈ سے رقم نہ ملی توجب تک نہ ملے اس وقت تک اسکی ادائیگی لازم نہیں ، لیکن منظور احمد کا یہ کہنا '' اگر کنٹومنٹ بورڈ کی طرف سے چیک نہ ملے تو میں اپنا فلیٹ بیچ کر آپکی رقم ادا کرونگا''ایک وعدہ کی صورت ہے جس کا ایفاء ان پر لازم تھااب جبکہ انکا انتقال ہوگیا تو انکے ورثاء پر اس وعدہ کا ایفاء لازم نہیں ہے،البتہ اتناضرور ہے کہ ورثاء کو چاہیے کہ متعلقہ ادارے سے اس رقم کے حصول کی کوشش کریں بعد از حصول وہ رقم اختر عالم فاروقی کو دی جائے۔

البتہ اختر عالم فاروقی کے لئے بہتر ہے کہ اپنی رقم معاف کردیں تاکہ منظور احمد عذاب سے محفوظ رہے اور اسکے عوض انہیں ثواب ملے کہ مومن سے نیکی ہے۔ جیساکہ ہندیہ میں بھی ہے: دين لرجل على آخر لا يقدر على استيفائه كان إبراؤه خيرا من أن يدعي عليه؛ لأن في الإبراء تخليصا من العذاب في الآخرة وكان فيه ثواب كذا في الفتاوى الكبرى۔ ترجمہ:ایک شخص کا دوسرے پر دَین ہو جسکی ادائیگی کی وہ استطاعت نہ رکھتا ہو تو اسکو معاف کرنا دعوٰی کرنے سے بہتر ہے کیونکہ معاف کرنے میں آخرت میں عذاب سے نجات ہےاور اس میں ثواب بھی ہے جیساکہ فتاوٰی کبرٰی میں ہے۔(فتاوی ھندیۃ،کتاب الغصب،الباب الرابع عشر فی المتفرقات،5،ص157)۔

واللہ تعالٰی اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابو الحسنین مفتی وسیم اختر المدنی

تاریخ اجراء:20 رجب المرجب 1445ھ/ 01 فروری 2024 ء