شریعت اسلامیہ میں ایک کے کیے کی سزا دوسرے شخص کو نہیں دی جاسکتی ۔ قرآن مجید میں اللہ کریم ارشاد فرماتا ہے:أَلَّا تَزِرُ وَازِرَةٌ وِزْرَ أُخْرَى۔ترجمہ کنزالایمان: کہ کوئی بوجھ اٹھانے والی جان دوسری کا بوجھ نہیں اٹھاتی ۔(سورۃ النجم:آیت نمبر 38)

تفسیر طبری میں اس آیت کے تحت ہے:لَا يُؤَاخَذُ أَحَدٌ بِذَنْبِ غَيْرِهِ ترجمہ:کسی شخص سے دوسرے کے گناہ کا مواخذہ نہیں کیا جائے گا۔(جامع البيان عن تأويل آي القرآن، جلد 22 ص 72)

تفسیربغوی میں ہے:أَيْ لَا تَحْمِلُ نَفْسٌ حَامِلَةٌ حِمْلَ أُخْرَى، وَمَعْنَاهُ: لَا تُؤْخَذُ نَفْسٌ بِإِثْمِ غَيْرِهَا،ترجمہ:ایک جان دوسری جان کا بوجھ نہیں اٹھائے گی یعنی ایک کے گناہ کی وجہ سے دوسرے سے بدلہ نہیں لیا جائے گا۔(معالم التنزيل في تفسير القرآن، جلد 4 ص 314)

لہذا آپ کے والد اور بھائی کا یہ تقاضا کرنا کہ تم بھی اپنی زوجہ سے ایسا سلوک کرو جیسے وہ تمہاری بہن سے کرتا ہے جائز نہیں ہے۔کہ قرآن کی اس آیت کے منافی ہے ۔ کہ جب وہ اپنے شوہر سے راضی ہے اور اسکا شوہر اس سے راضی ہے اسکے باوجودبہن سےبہنوئی کے برتاؤ کی وجہ سے یہ تقاضا جہالت ہے۔

واللہ تعالٰی اعلم بالصواب

کتبــــــــــــــــــہ:محمد زوہیب رضا قادری

الجواب الصحیح:ابو الحسنین مفتی وسیم اختر المدنی

تاریخ اجراء:26 شوال المکرم 1441 ھ/18 جون 2020 ء