صورت ِمستفسرہ میں جبکہ یہ معاہدہ ان شرائط کے ساتھ تقریباًتمام کمپنیوں میں رائج ہے اور یہ شرائط درج ذیل وجوہات کی بناء پر لاگو کی گئی ہیں:

1:کمپنی کے بہت سےکام ملازم پر موقوف ہوتےہیں یعنی اگر ملازم اچانک چھوڑ کر چلا جائے تو اس صورت میں کمپنی کو بہت بڑے نقصان سے دو چار ہونا پڑتاہے۔اور آج کل کا دور مقابلے کا ہے یعنی ہر کمپنی دوسرے سے آگے نکلنے کی کوشش کرتی ہے اور اس کی خاطر وہ آگے نکلنے والی کمپنیوں کے ملازموں کو اپنے پاس بلانے کے لیے اچھی سیلری اور دیگر مراعات کی آفر کرتی ہے ۔اگر اس طرح کی شرائط نہ رکھی جائیں تو کوئی بھی ملازم اپنے فائدے کو دیکھتے ہوئے فی الفور کمپنی چھوڑ دےگا اوراس کے جانے کے سبب کمپنی کو خسارہ اٹھانا پر جائےگا۔

2:اسی طرح کمپنی اگر ملازم کو بغیر نوٹس نکا ل دے توفوراً اس ملازم کوکسی اور کمپنی میں اچھی ملازمت کا ملنا انتہائی دشوار ہے،بالخصوص موجودہ حالات میں کہ جہاں ملازمتوں کا فقدان ہے ۔ہر طرف بےروزگاری کادور دوراہے۔ نیز ملازم کے لیے اپنے اخراجات ہی پورا کر نا مشکل ہوجائیں گے ۔ملازم قرض ،سوداور اسی جیسی کئی مشکلات اور گناہوں میں مبتلا ہوجائیگا۔ یہ ملازم کے لیے ایک بہت بڑا ضرر ہے۔

پس اس صورتِ حال میں شرعی حکم یہ ہے کہ ان شرائط کے باوجود یہ عقد درست ہے ۔

مسئلے کی تفصیل یہ ہے کہ سوال میں مذکور شرائط اگرچہ عقدانکا تقاضہ نہیں کرتالیکن مذکورہ بالا وجوہات کے سبب ضرر سے بچنے کےلیے یہ شرائط عقد کے لیے ضروری ہوگئی ہیں اس لیےکہ حدیث مبارک میں ہے : عَنْ عُبَادَةَ بْنِ الصَّامِتِ، أَنَّ رَسُولَ اللَّهِ صَلَّى اللهُ عَلَيْهِ وَسَلَّمَ، قَضَى أَنْ لَا ضَرَرَ وَلَا ضِرَارَ ترجمہ:سیدنا عبادہ بن صامت رضی اللہ تعالی عنہ نے مروی ہے ،نبی کریمﷺ نے حکم دیا:نہ نقصان اٹھاؤ اور نہ نقصان پہنچاؤ۔ (سنن ابن ماجہ:2340)

اسی طرح فقہ کا اصول ہے:الضرر یزال:نقصان کو دور کیا جاتا ہے(الاشباہ والنظائرلابن نجیم،صفحہ:72،دارالکتب العلمیۃ،بیروت)

مزید یہ کہ اگر یہ اجارہ فاسد قرار دیا جائے تو اس صورت میں کئی لوگ ناجائز عقد کرنے اور ناجائز کمائی کھانے کے مرتکب ہوجائیں گے اور یہ ایک حرج عظیم ہے ۔

پس ان دلائل کی روشنی میں یہ بات واضح ہوگئی کہ موجودہ دور میں عقد ان شرائط کا تقاضہ کرتا ہے اور جن شرائط کا عقد تقاضہ کرے وہ فاسدہ نہیں ہوتی بلکہ جن کا نہ کرے وہ ہوتی ہیں جیسا کہ درمختار میں ہے: الاصل الجامع فی فساد العقد شرط لایقتضیہ العقد ولایلائمہ وفیہ نفع لاحد ہما: ترجمہ: فساد عقد میں قاعدہ کلیہ یہ ہے کہ وہ شرط ایسی ہو جس کا تقاضہ عقد نہیں کرتا اورنہ ہی وہ عقد کے ملائم ہے اور اس میں عاقدین میں سے کسی کا نفع ہو ۔(رد المختار علی الدرالمختار،جلد:5،ص:84،دارالفکر بیروت)لہذاایسی شرائط سے عقد فاسد نہ ہوگا۔

واللہ تعالٰی اعلم بالصواب

کتبـــــــــــــــــہ:محمد احمد امین قادری نوری

الجواب الصحیح :ابوالحسنین مفتی وسیم اختر المدنی

تاریخ اجراء:16رمضان المبارک 1442 ھ/29اپریل 2021 ء