بیوی اور شوہر کے بیان کے مطابق یہ الفاظ "میں نے تجھے چھوڑ دیا ہے " کہنے سے ایک طلاق رجعی واقع ہوگئی اورعدت شروع ہوگئی ،پھر چونکہ طلاق دوران حمل دی گئی اسلیےاسکی عدت وضع حمل ہے لہذا وضع حمل(بچے کی پیدائش )ہوتے ہی بیوی کی عدت مکمل ہوگئی اور بیوی اس شوہرکے نکاح سے باہر ہوگئی،اب بیوی کا شوہر کے ساتھ کوئی تعلق نہیں رہا ،اب بیوی کا بغیر نکاح کے شوہر کے ساتھ رہنا حرام ہے۔اورعدت گزرنے کے بعد تجھے چھوڑ دیا ،آزاد کیا وغیرہ جتنی بار بھی کہا وہ کہنالغواور بیکار ہو گیا کیونکہ بیوی طلاق کا محل ہی نہ رہی۔

البتہ اب اگر دونوں ساتھ رہنا چاہیں تو اسکا طریقہ یہ ہے کہ اب دوبارہ نیا نکاح، نئے گواہ اور نیا حق مہر مقرر کرنا ہوگا۔اور آئندہ محض دو طلاقوں کا حق باقی رہے گا۔

بدائع الصنائع میں ہے : أنها تحل في كل واحدة منهما بنكاح جديد من غير التزوج بزوج آخر:ترجمہ:طلاق رجعی(میں عدت گزرنے کے بعد) اور طلاق بائن میں سے ہر ایک میں عورت دوسرے شوہر سے شادی کئے بغیر محض نکاح جدید سے ہی سابقہ شوہر کے لیے حلال ہوجائے گی۔(بدائع الصنائع کتاب النکاح فصل فی الکنایۃ فی الطلاق جلد 3 ص 108 )

میں نے تجھ چھوڑ دیا عرفاً طلاق صریح ہے جیسا کہ اعلیٰ حضرت ایک سوال کے جواب میں لکھتے ہیں: عورت کو چھوڑدینا عرفاً طلاق میں صریح ہے، خلاصہ وہندیہ میں ہے: لوقال الرجل لامرأتہ تراچنگ باز داشتم او بہشتم اویلہ کردم ترااوپاے کشادہ کردم ترافھذاکلہ تفسیر قولہ طلقتک عرفا حتی یکون رجعیا ویقع بدون النیۃ ۔ترجمہ: اگر کوئی شخص بیوی کو کہے''میں نے تیرا چنگل باز رکھا، تجھے چھوڑا ہے، تجھے جُدا کردیا ہے یا تیرے پاؤں کھول دئے ہیں، تویہ تمام الفاظ عرفاً''تجھے طلاق دی'' کے ہم معنٰی ہیں، اس لئے ان سے رجعی طلاق ہوگی اور بغیر نیت طلاق ہوگی۔۔(فتاوی رضویہ کتاب الطلاق جلد 13 ص 582)

اسی طرح حضرت صدر الشریعہ مفتی امجد علی اعظمی فرماتے ہیں :اردو میں یہ لفظ کہ '' میں نے تجھے چھوڑا''، صریح ہے اس سے ایک رجعی ہوگی، کچھ نیت ہو یا نہ ہو۔(بہار شریعت حصہ 8جلد 2ص 116)

اور حاملہ ہونے کی صورت میں عدت وضع حمل یعنی جب تک بچہ پیدا نہ ہو تب تک عدت ہے۔اللہ تعالیٰ کا ارشاد ہے:وَاللَّائِي يَئِسْنَ مِنَ الْمَحِيضِ مِنْ نِسَائِكُمْ إِنِ ارْتَبْتُمْ فَعِدَّتُهُنَّ ثَلَاثَةُ أَشْهُرٍ وَاللَّائِي لَمْ يَحِضْنَ وَأُولَاتُ الاحمال أَجَلُهُنَّ أَنْ يَضَعْنَ حَمْلَهُنَّ ۔ترجمہ:اور تمھاری عورتوں میں جو حیض سے نا امید ہوگئیں اگر تم کو کچھ شک ہو تو اُن کی عدت تین مہینے ہے اور اُن کی بھی جنھیں ابھی حیض نہیں آیا ہے اور حمل والیوں کی عدت یہ ہے کہ اپنا حمل جن لیں۔(الطلاق 4)

واللہ تعالٰی اعلم بالصواب

کتبـــــــــــــــــــــــــــہ:محمد احمد امین قادری نوری

الجواب الصحیح:ابوالحسنین مفتی وسیم اختر المدنی

تاریخ اجراء:09 ذو الحجۃ 1441 ھ/31 جولائی 2020 ء