مذکورہ صورتحال میں رہائشی پلاٹ پر رشوت دے کر دوکان بنانا جائز نہیں کہ رہائشی پلاٹ پر دکان وغیرہ بنانے سے لوگوں کو اذیت ہوتی ہے پھر گورنمنٹ کی طرف سے بھی اجازت نہیں ہوتی کہ وہاں دوکانیں بنائی جائیں ، نیز علاقے کے باقی لوگ اگر بنا رہے ہیں تو وہ بھی ناجائز ہے اور ایک ناجائز کام دوسرے ناجائز کام کی دلیل نہیں بن سکتا۔

رقم دینے کے جواز کی صورت یہ ہے کہ جب انسان کا حق متعلق ہوجائے لیکن کوئی شخص حاکم یا اسکا غیر اس کام میں رکاوٹ بنے تو اب اپنے حق کو و صول رنے کے لئے جو رقم دی جاتی ہے اس میں دینے والے پر گناہ نہیں ہوتا البتہ لینے والا بہر حال گنہ گار مستحق عذابِ نار ہوتا ہے یہاں تو حق ہی متعلق نہیں ہوا کہ اسکو حاصل کرنے کے لئے رقم دی جائے بلکہ ابھی گزرا کہ رہائشی علاقے میں دکان بنانے کا حق ہی نہیں کہ اسے وصول کرنے کے لئے بطورِ رشوت رقم دی جائے۔

علامہ علی بن سلطان ملا علی قاری (المتوفی:1014ھ) حدیث مبارکہ کے تحت فرماتے ہیں:"الرِّشْوَةُ مَا يُعْطَى لِإِبْطَالِ حَقٍّ، أَوْ لِإِحْقَاقِ بَاطِلٍ، أَمَّا إِذَا أَعْطَى لِيَتَوَصَّلَ بِهِ إِلَى حَقٍّ، أَوْ لِيدْفَعَ بِهِ عَنْ نَفْسِهِ ظُلْمًا فَلَا بَأْسَ بِهِ"۔ترجمہ:رشوت وہ ہے جوکسی کاحق باطل کرنے یا باطل کو حق دلانے کیلئے دی جائے، لیکن اگر اس لئے دی جائے کہ اسکے ذریعے حق وصول ہو یا اپنے سے ظلم کو روکنے کیلئے ہو تو کوئی حرج نہیں۔(مرقاۃ المفاتیح،6/2437،رقم الحدیث:3753،دار الفکر)

واللہ تعالٰی اعلم بالصواب

کتبـــــــــــــــــــــــــــــہ: محمدزوہيب رضاقادري

الجـــــواب صحــــيـح:ابو الحسنين مفتي وسيم اختر المدني

تاريخ اجراء:01 رمضان المبارک 1445ھ/ 12 مارچ 2024 ء