mulazim ko company ki taraf se di gai gari aage kiraye par dena kaisa

کمپنی ملازم کو جوگاڑی استعمال کے لیےدیتی ہے وہ بطور عاریت دیتی ہے ،کہ جب تک وہ کمپنی کا ملازم ہے تب تک وہ خود اس گاڑی سے بلا عوض نفع اٹھا سکتا ہے،اسکو اصطلاح شرع میں اعارہ یا عاریت کہتے ہیں۔تنویر الابصار مع الدر المختار میں ہے: الْعَارِيَّةِ (هِيَ) شَرْعًا (تَمْلِيكُ الْمَنَافِعِ مَجَّانًا) ترجمہ:دوسرے شخص کو کسی چیز کی منفعت کا بغیر کسی عوض کےمالک بنا دینے کو شریعت میں عاریت کہتے ہیں۔( تنویر الابصار مع الدر المختار کتاب العاریۃ جلد 5ص676)

اورجو چیز بطور عاریت حاصل ہو اس کو آگے کرائے پر دینا جائز نہیں ہے،اسی میں ہے :(وَلَا تُؤَجَّرُ وَلَا تُرْهَنُ) لِأَنَّ الشَّيْءَ لَا يَتَضَمَّنُ مَا فَوْقَهُ۔ترجمہ:اور شئے مستعار (یعنی جو چیز بطور عاریت دی گئی ہے)کو اجارہ پر نہیں دیا جا سکتاہے ، اور نہ ہی بطور رہن رکھوایا جا سکتا ہے،کیونکہ کوئی بھی چیز خود سے مافوق چیزکی ضامن نہیں ہو سکتی۔(المرجع السابق)

ہدایہ شرح بدایۃ المبتدی میں ہے:وليس للمستعير أن يؤاجر ما استعاره؛ فإن آجره فعطب ضمن لأن الإعارة دون الإجارة والشيء لا يتضمن ما هو فوقه۔ترجمہ: مستعیر (جس کو چیز بطور عاریت دی ہے)کے لیے جائز نہیں کہ جو چیز اسکو بطور عاریت کے دی ہے اسکو کرائے پر دےاگر کرائے پر دی اور وہ شئے مستعار (یعنی جو چیز بطور عاریت دی گئی ہے)ہلاک (ضائع) ہوگئی تو اس کا ضامن ہوگا کیونکہ اعارہ ،اجارہ سے کم درجہ کا ہے اور کوئی بھی چیز خود سے مافوق چیزکی ضامن نہیں ہو سکتی۔( شرح بدایۃ المبتدی کتاب العاریہ جلد 3ص219)

خلاصہ یہ ہوا کہ کمپنی کی دی ہوئی گاڑی آگے کرائے پر دینا جائز نہیں ہے ،اگر دی اور ہلاک ہوگئی تو اس پر ضمان لازم ہوگا۔

واللہ تعالیٰ اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابو الحسنین مفتی وسیم اختر المدنی

تاریخ اجراء:03 ربیع الاول 1441 ھ/09 نومبر 2019 ء