manasakha hukm hawala number 1272

تعمیرات کا حکم:

اگر عبدالحفیظ اور محمد انوار نے دیگر ورثاء کی اجازت سے تعمیرات کروائی ہیں تو بے شک یہ دونوں اپنی اپنی تعمیرات کے مالک ہیں ۔ بایں طور کہ کل تعمیرات ساڑھے نو لاکھ کی ہیں اور اس میں ایک بھائی نے 8 لاکھ جبکہ دوسرے نے ڈیڑھ لاکھ لگائے تو پہلے بھائی کا تناسب 84.21 ہے جبکہ دوسرے کا 15.79 ہے۔ لہذا یہ دونوں ان تعمیرات کے اسی تناسب کے اعتبار سے مالک ٹھہریں گے ۔ اور اگر یہ تعمیرات دیگر ورثاء کی اجازت کے بغیر تھی تو مکمل تعمیرات تبرع قرار پائیں گی۔ اور کل زمین مع عمارت تمام ورثاء میں انکے شرعی حصص کے اعتبار سے تقسیم ہوگی۔

وراثت کا مال تمام ورثاء کو بطور شرکت ملک حاصل ہوتا ہے، اور شرکت الملک میں تمام ورثاء ایک دوسرے کےحصہ میں اجنبی کی طرح ہوتے ہیں کوئی بھی وارث دوسرے کے حصے میں اسکی اجازت کے بغیر تصرف نہیں کرسکتا ۔جبکہ اجازت کے ساتھ تصرف جائز ہے، تنویر الابصار مع الدر المختار میں ہے: شَرِكَةُ مِلْكٍ، وَهِيَ أَنْ يَمْلِكَ مُتَعَدِّدٌ عَيْنًا أَوْ دَيْنًا أَوْ بِإِرْثٍ أَوْ بَيْعٍ أَوْ غَيْرِهِمَا،وَكُلٌّ أَجْنَبِيٌّ فِي مَالِ صَاحِبِهِ۔ترجمہ: شرکت ملک یہ ہے کہ متعدد اشخاص عین یا دین میں یا وراثت میں یا بیع یا کسی اور چیز میں مشترکہ مالک ہوجائیں ،ان میں سے ہر ایک دوسرے کے حصہ میں اجنبی ہوگا۔(تنویر الابصار مع الدر المختار ،کتاب الشرکۃ جلد 4 ص 299،300)

تبیین الحقائق شرح کنز الدقائق میں ہے: وَكُلُّ وَاحِدٍ مِنْهُمَا أَجْنَبِيٌّ فِي نَصِيبِ صَاحِبِهِ حَتَّى لَا يَجُوزَ لَهُ أَنْ يَتَصَرَّفَ فِيهِ إلَّا بِإِذْنِهِ۔ ترجمہ:ان میں سے ہر ایک دوسرے کے حصہ میں اجنبی کی طرح ہے حتٰی کی ایک کو دوسرے کے حصے میں اسکی اجازت کے بغیر تصرف کرنا جائز نہیں ہے۔(تبیین الحقائق شرح کنز الدقائق کتاب الشرکۃ جلد 3 ص 313)

سیدی اعلٰی حضرت لکھتے ہیں :فی العقود الدریۃ من کتاب العاریۃ سئل فی رجل بنی بمالہ لنفسہ قصرا فی دار ابیہ باذنہ ثم مات ابوہ عنہ و عن ورثۃ غیرہ فھل یکون القصر لبانیہ الجواب نعم کما صرح بذٰلک فی حاشیۃ الاشباہ۔ترجمہ: العقود الدریۃ میں کتاب العاریۃ کے بیان میں مذکور ہے، ایک ایسے شخص کے متعلق سوال کیا گیا جس نے اپنے باپ کی اجازت سے اس کی زمین پر اپنے مال سے اپنے لئے گھر بنایا پھر باپ اس سمیت دیگر ورثاء کو چھوڑ کر فوت ہوگیا تو یہ گھر اس بانی کا ہوگا ۔الجواب، ہاں۔ جیسا کہ اس کی تصریح الاشباہ میں ہے۔(فتاوٰی رضویہ،کتاب الوکالۃ ،جلد 19 ص 224 رضا فاؤنڈیشن ،لاہور)

مجلۃ الاحکام میں ہے:تَقْسِيمُ حَاصِلَاتِ الْأَمْوَالِ الْمُشْتَرَكَةِ فِي شَرِكَةِ الْمِلْكِ بَيْنَ أَصْحَابِهِمْ بِنِسْبَةِ حِصَصِهِمْ۔ترجمہ:شرکۃ الملک میں مال مشترک کی تقسیم تمام لوگوں کے حصوں کی نسبت سے ہوگی۔( مجلۃ الاحکام الفصل الثانی فی بیان کیفیۃ التصرف ج1ص206 مادہ نمبر 1073 )

وراثت کی تقسیم کا حکم:

1: والد کی وفات کے بعد عبدالحفیظ نے اپنی جانب سے اپنے بھائی محمد وقار کوانکے تقاضے پر حصہ دے دیا تو اب وقار کے ورثاء اس جائیداد میں حصہ نہیں پائیں گے ،بلکہ اس حصے کے مالک عبدالحفیظ قرار پائیں گے، کیونکہ ورثاء کے مابین اس طرح کے معاملات حکماً بیع قرار پاتے ہیں گویا عبدالحفیظ نے محمد وقار کا حصہ خریدلیا۔

2: مذکورہ وراثت کی تقسیم درج ذیل طریقے سے ہوگی۔

کل حصے: 760320

ہر وارث کا حصہ:

عبدالجبار:223560 ، عبدالحفیظ :223560، علی:21120 ، فاطمہ :10560، آمنہ:16560، عمران:23184، ارسلان:23184

احسان:23184، ثنا:11592، شازیہ:11592، شاذمہ:11592، شمین:11592، سعیدہ:18630، عامر:43470

ارباز: 43470 عامرہ:21735 مریم:21735

نوٹ: چونکہ عبدالحفیظ نے وقار احمد کا حصہ ان سے خرید کر اپنی جانب سے حصہ دے دیا تھا تو اب وقار احمد کے ورثاء( یعنی آمنہ، عمران، ارسلان، احسان، ثنا، شازیہ، شاذمہ، شمین) کے حصص عبدالحفیظ کو ملیں گے اس طرح کل حصوں میں سے عبدالحفیظ کو ٹوٹل 356130 حصے ملیں گے۔

وراثت کی مذکورہ تقسیم اللہ تعالٰی کے مقرر کردہ حصوں کے مطابق ہے:لڑکے لڑکیوں کے بارے میں ارشاد فرمایا:یُوصِیکُمُ اللَّہُ فِی أَوْلَادِکُمْ لِلذَّکَرِ مِثْلُ حَظِّ الْأُنْثَیَیْنِ۔ترجمہ کنز الایمان : اللہ تعالی تمہیں حکم دیتا ہے تمھاری اولاد کے بارے کہ بیٹے کا حصہ دو بیٹیوں برابر ہے۔(النساء : آیت نمبر 10)

السراجی فی المیراث ص19میں ہے:ومع الابن للذکر مثل حظ الانثیین۔ترجمہ:اور للذکر مثل حظ الانثیین کے تحت بیٹی کو بیٹے کے حصے کا نصف ملے گا۔

بیویوں کے بارے میں ارشاد ہے :قال اللہ تعالیٰ :وَلَهُنَّ الرُّبُعُ مِمَّا تَرَكْتُمْ إِنْ لَمْ يَكُنْ لَكُمْ وَلَدٌ فَإِنْ كَانَ لَكُمْ وَلَدٌ فَلَهُنَّ الثُّمُنُ۔ترجمہ کنز الایمان : تمہارے ترکہ میں عورتوں کا چوتھائی ہے اگر تمہارے اولاد نہ ہو پھر اگر تمہارے اولاد ہو تو ان کا تمہارے ترکہ میں سے آٹھواں ۔(النساء : آیت نمبر 11)

فائدہ : رقم تقسیم کرنے کا طریقہ یہ ہے کہ جائیداد کی مارکیٹ ویلیو لگوا لیں بعد ازاں بقیہ کل رقم کومبلغ یعنی 760320 پرتقسیم کردیں جو جواب آئے اسکو ہر ایک کے حصے میں ضرب دے دیں،حاصل ضرب ہر ایک کا رقم کی صورت میں حصہ ہوگا۔

3: بیٹوں کی موجودگی میں پوتوں کا دادا کی وراثت میں کچھ حصہ نہیں ہوگا،کیونکہ مسائل میراث کا اصول ہے کہ قریبی رشتہ دار کی موجودگی میں دور والا رشتہ دار محروم رہتا ہے۔ چناچہ السراجی فی المیراث ص36میں ہے:''اولاہم بالمیراث جزء المیت ای البنون ثم بنوہم وان سفلوا''ترجمہ: میت کی وراثت کے زےادہ حقدار میت کا جزء ےعنی بیٹے ہیں ،(اگر بیٹے نہ ہوں تو)اسکے بعد پوتے ۔(السراجی فی المیراث ص36)

تنویرالابصار مع الدرالمختار کتاب الفرائض باب العصبات جلد6ص774پر ہے :''(وَیُقَدَّمُ الْأَقْرَبُ فَالْأَقْرَبُ مِنْہُمْ) بِہَذَا التَّرْتِیبِ فَیُقَدَّمُ جُزْء ُ الْمَیِّتِ (کَالِابْنِ ثُمَّ ابْنِہِ وَإِنْ سَفَلَ''ترجمہ: اور (میت کے رشتے داروں میں سے) قریب کے رشتے دار کو وراثت دینے میں مقدم کیاجائے گا پھر جو اسکے بعد زیادہ قریب ہو اسکو مقدم کیاجائے گا ،اسی ترتیب سے آگے تک لہذا میت کے جزء یعنی بیٹے کووراثت دینے میں مقدم کیا جائے گا (اگر بیٹا نہ ہوتو)پھر اسکا بیٹے(یعنی پوتے کو )وراثت دینے میں مقدم کیا جائے گا۔

بخاری شریف کتاب الفرائض بَابُ مِیرَاثِ ابْنِ الِابْنِ إِذَا لَمْ یَکُنِ ابْنٌ میں ہے :''وَقَالَ زَیْدٌ: وَلاَ یَرِثُ وَلَدُ الِابْنِ مَعَ الِابْنِ''ترجمہ:حضرت زید بن ثابت فرماتے ہیں کہ میت کے بیٹے کی موجودگی میں پوتا وراثت میں حصہ دار نہیں بنے گا۔

واللہ تعالٰی اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابو الحسنین مفتی وسیم اختر المدنی

تاریخ اجراء:رجب المرجب 1446ھ/ 16 جنوری 2025ء