islamic naya pakistan certificate mein sarmaya kari ka sharai hukm

وضاحت: ہم کسی بینک کے نمائندے یا تشہیر کار نہیں، ہمارا مقصد صرف شرعی حکم واضح کرنا ہے۔

اسٹیٹ بینک آف پاکستان، میزان بینک اور دیگر ایجنٹ بینکوں کی جاری کردہ معلومات کے مطابق ’’اسلامک نیا پاکستان سرٹیفکیٹ‘‘ مضاربت کی بنیاد پر جاری ہوتے ہیں، جن میں نفع پہلے سے طے شدہ فیصد کے تناسب سے تقسیم ہوتا ہے، متعین نفع کی کوئی ضمانت نہیں ہوتی، اور جمع شدہ رقم وفاقی حکومت کو اس کے متعین اثاثے خرید کر واپس اجارے پر دینے کی صورت میں فراہم کی جاتی ہے؛ لہذا ان سرٹیفکیٹس میں سرمایہ کاری کرنا اور ان پر ملنے والا نفع لینا جائز ہے، جب تک یہ معاملہ عملاً اسی ڈھانچے کے مطابق رہے؛ البتہ عام (غیر شرعی) نیا پاکستان سرٹیفکیٹ سود پر مبنی ہیں، ان میں سرمایہ کاری کرنا ناجائز و حرام ہے۔

تفصیل مسئلہ:

اسلامک نیا پاکستان سرٹیفکیٹ اور عام نیا پاکستان سرٹیفکیٹ میں فرق:

عام نیا پاکستان سرٹیفکیٹ حکومت کی طرف سے پبلک ڈیٹ ایکٹ (سرکاری قرض کے قانون) کے تحت جاری کی جانے والی سیکیورٹی ہے، جس میں سرمایہ کار حکومت کو اپنی رقم بطورِ قرض دیتا ہے اور اس پر پہلے سے مقرر شرح سے منافع لیتا ہے، اور قرض پر مشروط نفع سود ہے؛ جبکہ اسلامک نیا پاکستان سرٹیفکیٹ میں سرمایہ کار حکومت کو قرض نہیں دیتا، بلکہ حکومت کی قائم کردہ کمپنی کے ساتھ مضاربت کرتا ہے، اور کمپنی اس رقم سے حکومت کے اثاثے خرید کر انہیں حکومت ہی کو کرائے پر دیتی ہے، اور اسی کرائے سے حاصل ہونے والا نفع طے شدہ تناسب سے تقسیم ہوتا ہے، جس کی شرح متعین یا یقینی نہیں ہوتی۔

اسلامک نیا پاکستان سرٹیفکیٹ کا طریقۂ کار ترتیب وار:

(۱) یہ سہولت بیرونِ ملک مقیم پاکستانیوں، اور ان مقیم پاکستانیوں کے لیے ہے جن کے بیرونِ ملک ظاہر شدہ اثاثے ہوں؛ سرمایہ کار کسی ایجنٹ بینک، مثلاً میزان بینک، میں آن لائن روشن ڈیجیٹل اکاؤنٹ کھولتا ہے، اور اس میں بیرونِ ملک سے بینکنگ چینل کے ذریعے رقم منتقل کرتا ہے۔ (۲) پھر بینک کی ویب سائٹ پر اسلامک نیا پاکستان سرٹیفکیٹ کا انتخاب کر کے مدت، کرنسی اور رقم بتاتا ہے، اور اسی کے ساتھ حکومت کی قائم کردہ کمپنی ’’اسلامک این پی سی کمپنی لمیٹڈ‘‘ کے ساتھ مضاربت کا معاہدہ ہوتا ہے، جس میں سرمایہ کار رب المال اور کمپنی مضارب ہوتی ہے۔ (۳) ایجنٹ بینک خود اس معاملے کا فریق یا مضارب نہیں، بلکہ کمپنی کا نمائندہ ہے، جو سرمایہ کار کی درخواست پر اس کے اکاؤنٹ سے رقم نکال کر کمپنی کے اکاؤنٹ میں منتقل کرتا ہے، کمپنی کی طرف سے جاری ہونے والے سرٹیفکیٹ سرمایہ کار کے سیکیورٹیز اکاؤنٹ میں جمع کرتا ہے، اور سرمایہ کاروں کا ریکارڈ رکھتا ہے۔ (۴) یہ سرٹیفکیٹ بذاتِ خود کوئی چیز نہیں، بلکہ اس بات کی سند ہے کہ سرمایہ کار کی رقم مضاربت کے پول میں شامل ہے؛ اس سرٹیفکیٹ سے سرمایہ کار کسی متعین چیز کا الگ سے مالک نہیں بنتا، البتہ مضاربت کے مال سے جو اثاثے خریدے جاتے ہیں وہ رب المال یعنی سرمایہ کاروں کی ملکیت ہوتے ہیں، تو ہر سرمایہ کار اپنی رقم کے تناسب سے پول کے اثاثوں میں غیر منقسم طور پر شریک ہوتا ہے۔ (۵) کمپنی پول کی رقم سے وفاقی حکومت کے متعین اثاثے، یعنی حکومت ہی کی ملکیت کی چیزیں، خریدتی ہے، اور پھر یہی اثاثے حکومت کو کرائے (اجارے) پر دے دیتی ہے، اور حکومت ان کا کرایہ ادا کرتی ہے۔ (۶) یہ کرایہ پول کی آمدنی ہے؛ ہر مہینے اس آمدنی سے اخراجات نکال کر نفع معلوم کیا جاتا ہے، پھر اس میں سے مضارب (کمپنی) اپنا طے شدہ حصہ لیتی ہے، اور باقی نفع سرمایہ کاروں میں ان کی مدت کے مطابق مقرر کردہ اوزان (Weightage) کے حساب سے تقسیم ہوتا ہے۔ (۷) مدت پوری ہونے پر سرمایہ کار کو اس کی رقم اور نفع یا نقصان، جو بھی ہو، اس کے بینک اکاؤنٹ میں ادا کیا جاتا ہے۔

اس پورے معاملے میں مضاربت سرمایہ کار اور کمپنی کے درمیان ہے، اور اجارہ کمپنی اور حکومت کے درمیان ہے، یعنی مضارب (کمپنی) سرمایہ کاروں کی رقم کو حکومت کے ساتھ اثاثوں کی خرید اور اجارے کے کاروبار میں لگاتی ہے؛ اور اسی کاروبار کا نفع مضاربت کا نفع ہے۔

اس سرٹیفکیٹ کی حقیقت:

حکومتِ پاکستان کی وزارتِ خزانہ نے S.R.O. 964(I)/2020کے ذریعے ان سرٹیفکیٹس کا شرعی ڈھانچہ جاری کیا، جس میں ہے:

"The funds in the Mudaraba pools shall only be used for extending Shariah compliant financing to the Federal Government."

"the resources of the pools shall be utilized to provide financing to the Federal Government under sale and lease back transactions with the Federal Government against an identified asset."

"The rental rate shall be mutually agreed between the SPV and the Federal Government enabling the SPV to have sufficient profits to remunerate the INPCs holders at the rate equivalent/close to the expected rates."

"The investment amount and applicable profit or loss shall be paid to the investor's designated bank account."

"The agent banks shall be eligible to share the profits of the pools as per the profit sharing ratio and mechanism agreed with them."

"The agent banks' investment in the pools shall be transitory in nature and shall be retired/withdrawn on receipt of individual investments in INPCs"

"The agent banks on receipt of these requests shall debit the investor's account and credit the SPV's account, temporary or transitory account;"

"The agent banks shall also open Investor Portfolio Securities (IPS) accounts of the investors and credit the securities in these accounts."

"…to determine the profits earned by each pool and its distribution or allocation to the investors based on their respective weightages after deduction of Mudarib share or fee."

(The Gazette of Pakistan, Extraordinary, October 6, 2020, S.R.O. 964(I)/2020)

https://archive.sbp.org.pk/acc/2020/C7-Annex-A.pdf

یعنی: مضاربت کے پولز کی رقم صرف وفاقی حکومت کو شریعت کے مطابق فنانسنگ دینے میں استعمال ہوگی، جو متعین اثاثے کی خرید اور اسے حکومت ہی کو واپس اجارے پر دینے کے معاملات کی صورت میں ہوگی؛ کرائے کی شرح کمپنی اور وفاقی حکومت باہمی رضامندی سے اتنی طے کریں گے کہ سرمایہ کاروں کو متوقع شرح کے برابر یا اس کے قریب نفع دیا جا سکے؛ اور سرمایہ کار کو اس کی رقم کے ساتھ جو نفع یا نقصان ہو، اس کے بینک اکاؤنٹ میں ادا کیا جائے گا۔ نیز ایجنٹ بینک سرمایہ کار کی درخواست پر اس کے اکاؤنٹ سے رقم نکال کر کمپنی کے اکاؤنٹ میں منتقل کرتے ہیں، اور سرمایہ کاروں کے سیکیورٹیز اکاؤنٹ کھول کر ان میں سرٹیفکیٹ جمع کرتے ہیں؛ اور ہر پول کا نفع مضارب کا حصہ یا فیس نکالنے کے بعد سرمایہ کاروں میں ان کے اوزان کے مطابق تقسیم کیا جاتا ہے۔ اور ایجنٹ بینک پولز کے آغاز میں جو ابتدائی سرمایہ کاری کرتے ہیں، اس پر وہ طے شدہ تناسب سے نفع میں شریک ہوتے ہیں، اور یہ سرمایہ کاری عارضی ہوتی ہے جو سرمایہ کاروں کی رقم آنے پر واپس لے لی جاتی ہے۔ نیز اس شرعی ڈھانچے میں نفع یا اصل سرمائے کی ضمانت، یا حکومت کی طرف سے اثاثے واپس خریدنے کے کسی وعدے کا ذکر نہیں۔

اور میزان بینک کی ویب سائٹ پر ہے:

"Investors will enter into a Mudarabah contract for investment of their funds in Shariah-compliant INPCs… The investors are Rab-ul Maal and INPC Company Limited is the Mudarib."

"The INPC Company Limited (Mudarib), will share the profit with investors on the basis of a predetermined percentage"

"As per the rules of Mudarabah, expected rates should not be considered as profit rate confirmation or guarantee."

"…are approved by both Shariah Advisory Committee of State Bank of Pakistan and Shariah Board of Meezan Bank Limited."

"State Bank of Pakistan (SBP) is the sole custodian of Islamic Naya Pakistan Certificate"

"Meezan Bank is acting as an agent to the same."

https://www.meezanbank.com/naya-pakistan-certificate/

یعنی: سرمایہ کار شریعت کے مطابق اسلامک نیا پاکستان سرٹیفکیٹ میں اپنی رقم لگانے کے لیے مضاربت کا معاہدہ کریں گے، جس میں سرمایہ کار رب المال اور آئی این پی سی کمپنی لمیٹڈ مضارب ہے؛ کمپنی سرمایہ کاروں کے ساتھ نفع پہلے سے طے شدہ فیصد کی بنیاد پر تقسیم کرے گی؛ مضاربت کے اصولوں کے مطابق متوقع نفع کو منافع کی تصدیق یا ضمانت نہ سمجھا جائے؛ اور (اس کا ڈھانچہ اور معاہدات) اسٹیٹ بینک کی شریعہ ایڈوائزری کمیٹی اور میزان بینک کے شریعہ بورڈ دونوں سے منظور شدہ ہیں؛ نیز اسٹیٹ بینک ان سرٹیفکیٹس کا واحد نگران ہے اور میزان بینک اس میں ایجنٹ (نمائندہ) ہے۔

اور عام (غیر شرعی) نیا پاکستان سرٹیفکیٹ کے بارے میں اسٹیٹ بینک آف پاکستان کی ویب سائٹ پر ہے:

"Naya Pakistan Certificate (NPC) is a fixed income security offered digitally by Government of Pakistan under NPC Rules 2020 framed under Public Debt Act, 1944. It is a sovereign security denominated in US Dollars, and Pak Rupees issued with full faith and credit of the Government of Pakistan."

"There is, however, no guarantee that INPCs will be remunerated on these rates as profits on INPCs will be paid based on the actual results of USD and PKR pools"

https://archive.sbp.org.pk/NPC-/FAQs.html

یعنی: نیا پاکستان سرٹیفکیٹ مقررہ آمدنی والی سیکیورٹی ہے، جو حکومتِ پاکستان نیا پاکستان سرٹیفکیٹ رولز 2020ء کے تحت ڈیجیٹل طور پر پیش کرتی ہے، اور یہ رولز پبلک ڈیٹ ایکٹ (سرکاری قرض کے قانون) 1944ء کے تحت بنائے گئے ہیں؛ یہ امریکی ڈالر اور پاکستانی روپے میں سرکاری سیکیورٹی ہے، جو حکومتِ پاکستان کی مکمل ذمہ داری اور ساکھ کے ساتھ جاری کی جاتی ہے۔ جبکہ اسلامک نیا پاکستان سرٹیفکیٹ کے بارے میں ہے کہ اس بات کی کوئی ضمانت نہیں کہ ان پر انہی شرحوں سے نفع دیا جائے گا، کیونکہ ان کا نفع ڈالر اور روپے کے پولز کے حقیقی نتائج کی بنیاد پر دیا جاتا ہے۔ معلوم ہوا کہ عام نیا پاکستان سرٹیفکیٹ میں سرمایہ کار حکومت کو قرض دیتا ہے اور اس پر پہلے سے مقرر شرح کے مطابق منافع لیتا ہے، اور قرض پر مشروط نفع سود ہے۔

شرعی حکم کی وضاحت:

اس معاملے کی فقہی صورت: رب المال نے مضارب کو مضاربت کے لیے رقم دی؛ مضارب نے اس رقم سے ایک شخص کے متعین اثاثے خریدے، اور پھر وہی اثاثے اسی بیچنے والے کو کرائے پر دے دیے؛ یہ کرایہ مضاربت کی آمدنی ہے، جس میں سے جائز اخراجات نکالنے کے بعد جو بچے وہ مضاربت کا نفع ہے، اور یہ نفع رب المال اور مضارب کے درمیان پہلے سے طے شدہ فیصد کے مطابق تقسیم ہوتا ہے؛ اور خریدے گئے اثاثے مضاربت کا مال ہونے کی وجہ سے رب المال کی ملکیت ہیں، جبکہ مضارب کا حق صرف نفع میں طے شدہ حصہ ہے؛ اور اگر نقصان ہو تو وہ رب المال پر ہوگا، بشرطیکہ مضارب کی کوتاہی سے نہ ہو۔

پوچھی گئی صورت پر اس کا اطلاق: اسلامک نیا پاکستان سرٹیفکیٹ لینے والا سرمایہ کار رب المال ہے، اور حکومت کی قائم کردہ ’’اسلامک این پی سی کمپنی لمیٹڈ‘‘ مضارب ہے، اور میزان بینک یا کوئی دوسرا ایجنٹ بینک اس معاملے کا فریق نہیں، بلکہ رقم کی منتقلی اور ریکارڈ کا کام کرنے والا نمائندہ ہے؛ کمپنی تمام سرمایہ کاروں کی رقم ایک پول میں جمع کر کے اس سے وفاقی حکومت کے متعین اثاثے خریدتی ہے، اور وہی اثاثے حکومت کو کرائے پر دے دیتی ہے، تو حکومت بیچنے والی بھی ہے اور کرایہ دار بھی؛ حکومت جو کرایہ ادا کرتی ہے وہی پول کی آمدنی ہے، جس میں سے ہر مہینے اخراجات نکال کر نفع معلوم کیا جاتا ہے، پھر اس میں سے کمپنی اپنا طے شدہ حصہ لیتی ہے، اور باقی نفع سرمایہ کاروں میں ان کی مدت کے مطابق مقرر اوزان (ویٹیجز) کے حساب سے تقسیم ہوتا ہے؛ اور سرٹیفکیٹ اس بات کی سند ہے کہ سرمایہ کار اپنی رقم کے تناسب سے پول اور اس کے اثاثوں میں شریک ہے۔

نوٹ برائے اہلِ علم: یہ ’’مضارب یضارب‘‘کی صورت نہیں، کیونکہ مذکورہ اقتباسات کے مطابق مضاربت کا عقد براہِ راست سرمایہ کار اور کمپنی کے درمیان ہے، جس میں سرمایہ کار رب المال اور کمپنی مضارب ہے؛ ایجنٹ بینک نہ سرمایہ کار سے مضاربت کرتا ہے اور نہ بطورِ مضارب نفع میں کوئی حصہ لیتا ہے، بلکہ وہ کمپنی کی طرف سے عقد کی انجام دہی، رقم اور سرٹیفکیٹ کی منتقلی اور ریکارڈ کا وکیل ہے؛ اور بینک کو جو نفع ملتا ہے وہ صرف اس کی اپنی عارضی سرمایہ کاری پر ہے، جس میں وہ خود رب المال کی حیثیت سے شریک ہوتا ہے۔ تو یہ صورت یوں ہے کہ سرمایہ کار اور کمپنی کے درمیان مضاربت ہے، کمپنی اور حکومت کے درمیان بیع اور پھر اجارہ ہے، اور بینک کمپنی کا وکیل ہے۔ ہاں اگر بینک سرمایہ کار سے خود مضاربت کرتا اور پھر یہ رقم آگے کمپنی کو مضاربت پر دیتا، تو یہ مضارب یضارب کی صورت ہوتی، جو رب المال کی اجازت پر موقوف ہوتی۔

اور مضاربت کے صحیح ہونے کے لیے ضروری ہے کہ نفع دونوں کے درمیان فیصد کے تناسب سے مشترک ہو، کسی کے لیے متعین رقم طے نہ ہو، اور مضارب کی کوتاہی کے بغیر ہونے والا نقصان رب المال برداشت کرے، مضارب اس کا ضامن نہ ہو۔ مذکورہ سرٹیفکیٹ میں رب المال اور مضارب کے درمیان نفع کی تقسیم کا تناسب فیصد کی صورت میں طے ہوتا ہے، کسی کے لیے متعین رقم طے نہیں ہوتی؛ اور بینک جو سالانہ شرحِ منافع (Expected Rate)بتاتا ہے، وہ نفع کی تقسیم کا تناسب نہیں، بلکہ محض ایک اندازہ ہے کہ پول کی آمدنی سے سرمایہ کار کو تقریباً کتنا نفع مل سکتا ہے، اس کی کوئی ضمانت نہیں، اور اصل نفع پول کی حقیقی آمدنی کے مطابق ملتا ہے؛ البتہ ضروری ہے کہ نفع کی تقسیم کا تناسب اور سرمایہ کار کا وزن (Weightage)اس کی سرمایہ کاری کے وقت معلوم ہو، اور اس کی مدت کے دوران اس کی رضامندی کے بغیر تبدیل نہ کیا جائے، کیونکہ نفع کے تناسب میں ایسی تبدیلی نزاع کا سبب بنتی ہے؛ تو اس شرط کے ساتھ یہ مضاربت کی شرائط کے مطابق ہے۔ رہا کمپنی کا یہ رقم حکومت کو دینا، تو یہ اس صورت میں ہوتا ہے کہ کمپنی حکومت سے اس کے متعین اثاثے خرید کر انہیں حکومت ہی کو کرائے پر دے دیتی ہے، اور یہی کرایہ پول کی آمدنی بنتا ہے؛ اور اپنی خریدی ہوئی چیز بیچنے والے کو کرائے پر دینا فی نفسہ جائز ہے، بشرطیکہ خرید و فروخت حقیقی ہو، یعنی متعین اثاثہ واقعی کمپنی کی ملکیت میں آئے اور ملکیت کے ذمہ داریاں (یعنی ضمان) کمپنی پر ہوں، اور اجارے کی شرط خرید و فروخت کے عقد میں نہ لگائی گئی ہو، کیونکہ ایسی شرط بیع کو فاسد کر دیتی ہے؛ اور حکومت سے لیا جانے والا کرایہ ہر مدت کے لیے معلوم و متعین ہو، خواہ پوری مدت کے لیے پہلے سے طے ہو یا ہر مدت کے شروع میں اس مدت کا کرایہ طے کر لیا جائے، کیونکہ اجارے میں اجرت کا معلوم ہونا شرط ہے؛ نیز یہ ’’بیع الوفا‘‘ نہ ہو کہ بیچنے والا جب چاہے وہی قیمت لوٹا کر اثاثہ واپس لے لے، کیونکہ بیع الوفا عند الفقہاء رہن کے حکم میں ہے، اور رہن رکھی ہوئی چیز کا کرایہ لینا سود ہے۔

خلاصہ حکم: چونکہ مذکورہ اقتباسات کے مطابق نفع طے شدہ فیصد کے تناسب سے تقسیم ہوتا ہے، متوقع شرح کی کوئی ضمانت نہیں، اور ان ذرائع میں اصل سرمائے یا نفع کی کسی ضمانت کا ذکر نہیں، نیز حکومت کے ساتھ معاملہ متعین اثاثوں کی خرید اور اجارے کی صورت میں ہے، اور اس ڈھانچے کو اسٹیٹ بینک کی شریعہ ایڈوائزری کمیٹی نے منظور کیا ہے، اس لیے اس میں سرمایہ کاری کرنا اور اس کا نفع لینا جائز ہے، اور عملی طور پر ان شرائط کی پابندی کی ذمہ داری انہی اداروں پر ہے؛ ہاں اگر کسی وقت یہ یقینی طور پر ثابت ہو جائے کہ نفع یا اصل سرمائے مع نفع کی ضمانت دی جاتی ہے، یا خرید و فروخت محض کاغذی ہے، یا کرایہ مجہول ہے، یا معاملہ بیع الوفا کی صورت میں ہے، تو پھر اس میں سرمایہ کاری ناجائز ہوگی۔ نیز یہ حکم صرف ’’اسلامک نیا پاکستان سرٹیفکیٹ‘‘ کا ہے؛ عام نیا پاکستان سرٹیفکیٹ، جو حکومت کو قرض دے کر اس پر مقررہ شرح سے منافع لینے پر مبنی ہیں، خالص سود ہیں، لہذا سرمایہ کاری کرتے وقت اس بات کا خاص خیال رکھا جائے کہ سرٹیفکیٹ اسلامی ہی ہو۔ اور جو شخص اس کے ڈھانچے کے بارے میں مطمئن نہ ہو، اس کے لیے احتیاط بہتر ہے۔

دلائل و جزئیات

سود کے حرام اور بیع کے حلال ہونے کے متعلق ارشاد باری تعالی ہے: وَ اَحَلَّ اللّٰهُ الْبَیْعَ وَ حَرَّمَ الرِّبٰوا. ترجمہ: اور اللہ نے حلال کیا بیع کو اور حرام کیا سود۔ (البقرۃ: 275)

مضاربت کی تعریف اور نفع کے تناسب سے مشترک ہونے کی شرط کے متعلق امام برہان الدین مرغینانی (المتوفی: 593ھ) فرماتے ہیں: "المضاربة عقد على الشركة بمال من أحد الجانبين ... ومن شرطها أن يكون الربح بينهما مشاعا لا يستحق أحدهما دراهم مسماة من الربح لأن شرط ذلك يقطع الشركة بينهما". ترجمہ: مضاربت ایسا عقد ہے جس میں ایک جانب سے مال اور دوسری جانب سے عمل کے ساتھ (نفع میں) شرکت ہوتی ہے … اور اس کی شرط یہ ہے کہ نفع دونوں کے درمیان مشترک (فیصد کے تناسب سے) ہو، کوئی ایک نفع میں سے متعین دراہم کا حقدار نہ ہو، کیونکہ ایسی شرط ان کے درمیان شرکت ختم کر دیتی ہے۔ (الہدایۃ، کتاب المضاربۃ، 3/200، دار احیاء التراث العربی بیروت)

مضاربت میں نقصان رب المال پر ہونے کے متعلق ملک العلماء علامہ علاء الدین ابو بکر بن مسعود کاسانی (المتوفی: 587ھ) فرماتے ہیں: "وكذلك لو شرط عليه أن الوضيعة علي وعليك، فهذه مضاربة والربح بينهما، والوضيعة على رب المال؛ لأن شرط الوضيعة على المضارب شرط فاسد فيبطل الشرط، وتبقى المضاربة". ترجمہ: اور اسی طرح اگر رب المال نے مضارب پر یہ شرط لگائی کہ نقصان مجھ پر بھی ہوگا اور تم پر بھی، تو یہ مضاربت ہے اور نفع دونوں کے درمیان ہوگا، اور نقصان رب المال پر ہوگا؛ کیونکہ مضارب پر نقصان کی شرط فاسد شرط ہے، تو شرط باطل ہو جائے گی اور مضاربت باقی رہے گی۔ (بدائع الصنائع، کتاب المضاربۃ، 6/80، دار الکتب العلمیۃ بیروت)

بیع میں خلافِ مقتضائے عقد شرط کے بیع کو فاسد کر دینے کے متعلق امام برہان الدین مرغینانی رحمۃ اللہ علیہ فرماتے ہیں: "كل شرط يقتضيه العقد كشرط الملك للمشتري لا يفسد العقد لثبوته بدون الشرط، وكل شرط لا يقتضيه العقد وفيه منفعة لأحد المتعاقدين أو للمعقود عليه وهو من أهل الاستحقاق يفسده". ترجمہ: ہر وہ شرط جس کا عقد تقاضا کرتا ہے، جیسے مشتری کے لیے ملکیت کی شرط، عقد کو فاسد نہیں کرتی، کیونکہ وہ شرط کے بغیر بھی ثابت ہے؛ اور ہر وہ شرط جس کا عقد تقاضا نہیں کرتا اور اس میں عاقدین میں سے کسی ایک کا، یا معقود علیہ کا (جبکہ وہ استحقاق کا اہل ہو) فائدہ ہو، وہ عقد کو فاسد کر دیتی ہے۔ (الہدایۃ، کتاب البیوع، باب البیع الفاسد، 3/48، دار احیاء التراث العربی بیروت)

اجارے میں اجرت کے معلوم ہونے کی شرط کے متعلق امام برہان الدین مرغینانی رحمۃ اللہ علیہ فرماتے ہیں: "ولا تصح حتى تكون المنافع معلومة والأجرة معلومة". ترجمہ: اور اجارہ صحیح نہیں ہوتا جب تک کہ منافع معلوم ہوں اور اجرت معلوم ہو۔ (الہدایۃ، کتاب الاجارات، 3/230، دار احیاء التراث العربی بیروت)

مضارب کے آگے مضاربت پر دینے کے رب المال کی اجازت پر موقوف ہونے کے متعلق امام برہان الدین مرغینانی رحمۃ اللہ علیہ فرماتے ہیں: "ولا يضارب إلا أن يأذن له رب المال أو يقول له اعمل برأيك". ترجمہ: اور مضارب (مال کو آگے) مضاربت پر نہیں دے سکتا، مگر یہ کہ رب المال اسے اجازت دے یا اس سے کہے کہ اپنی رائے سے کام کرو۔ (الہدایۃ، کتاب المضاربۃ، 3/202، دار احیاء التراث العربی بیروت)

بیع الوفا کے رہن کے حکم میں ہونے اور اس میں بیچنے والے پر کرایہ لازم نہ ہونے کے متعلق علامہ سید محمد امین ابن عابدین شامی (المتوفی: 1252ھ) نقل فرماتے ہیں: "سئل القاضي الإمام الحسن الماتريدي عمن باع داره من آخر بثمن معلوم بيع الوفاء وتقابضا ثم استأجرها من المشتري مع شرائط صحة الإجارة وقبضها ومضت المدة هل يلزمه الأجر فقال لا؛ لأنه عندنا رهن والراهن إذا استأجر الرهن من المرتهن لا يجب الأجر". ترجمہ: قاضی امام حسن ماتریدی سے اس شخص کے بارے میں پوچھا گیا جس نے اپنا گھر دوسرے کو متعین قیمت پر بیع الوفا کے طور پر بیچا اور دونوں نے قبضہ کر لیا، پھر اس نے اجارے کی شرائط کے ساتھ وہی گھر مشتری سے کرائے پر لے لیا اور اس پر قبضہ کر لیا اور مدت گزر گئی، تو کیا اس پر کرایہ لازم ہوگا؟ فرمایا: نہیں؛ کیونکہ یہ ہمارے نزدیک رہن ہے، اور جب راہن مرتہن سے رہن کی چیز کرائے پر لے تو کرایہ لازم نہیں ہوتا۔ (رد المحتار، کتاب البیوع، باب الصرف، مطلب باع دارہ وفاءً ثم استأجر، 5/278، دار الفکر بیروت)۔

واللہ تعالی اعلم بالصواب