سب سے پہلے یاد رہے کہ قومی بچت بینک میں رقم جمع کروانا اور اس سے منافع حاصل کرنا ناجائز ہے۔ کیونکہ اس سے حاصل ہونے والا منافع سودی ہوتا ہے کہ وہ قرضہ پر متعین( fixed)منافع دیتے ہیں اور اس کی مقدار عقد (agreement)کے وقت بتا دیتے ہیں اور شریعت اسلامیہ میں قرضہ پر مشروط و معین نفع سود ہے اور سود لینا شرعاًحرام قطعی ہے۔

جیساکہ حدیث مبارکہ میں ہے:''كُلُّ قَرْضٍ جَرَّ مَنْفَعَةً، فَهُوَ رِبًا"ترجمہ:ہر وہ قرضہ جو نفع دے وہ سود ہے ۔( مصنف ابن ابی شیبہ ،باب من کرہ کل قرض جر منفعۃ، رقم :20690)

لہذا والدہ کے سیونگ سرٹیفیکٹ کی صرف اصل رقم وراثت قرار پائے گی جبکہ ان پر ہونے والا سارا منافع بغیر نیتِ ثواب کے شرعی فقیر میں تقسیم کیا جائے گا۔

پھر والدہ کے ان پیسوں (اصل رقم )سے اس بہن کے ورثاء کو کچھ نہیں ملے گا، کیونکہ مال وراثت ان لوگوں میں تقسیم ہوتا ہے جو مورِث کی وفات کے وقت موجود ہوں۔پہلے انتقال کر جانے والے وارث کے ورثاء (بچوں )کو اسکے والدین کی وراثت سے کچھ حصہ نہیں ملتا۔ جیساکہ الہدایۃ شرح بدایۃ المبتدی میں ہے:ويقسم ماله بين ورثته الموجودين في ذلك الوقت ومن مات قبل ذلك لم يرث منه۔ترجمہ: اور میت کا مال اس کے ان ورثاء میں تقسیم ہوگا جو اسکی موت کے وقت موجود (زندہ) تھے اور جو ا س کی موت سے پہلے مرگئے وہ اس کے وارث نہیں ہونگے (یعنی ان میں وراثت تقسیم نہیں ہوگی)۔( الہدایۃ شرح بدایۃ المبتدی کتاب المفقود جلد 2ص 424)

یوں ہی البنایہ شرح الہدایہ میں اسی کے تحت ہے:وقسم ماله بين ورثته الموجودين في ذلك الوقت)أي وقت الحكم بالموت۔ترجمہ:اور اسکا مال اسکے ان ورثاء میں تقسیم کیا جائے گا جو اس(مورث)کی موت کے وقت موجود ہوں۔ (البنایہ شرح الہدایہ جلد 7ص367)۔

تنبیہ: واضح رہے کہ مرحومہ بہن کے شوہر کا دوسری شادی کرنے یا نہ کرنے سے وراثت کے استحقاق و عدمِ استحقاق کا کوئی تعلق نہیں بلکہ عدمِ استحقاق کی وجہ وہی مورث کی موت کے وقت حیات نہ ہونا ہے۔ کما مر آنفاً۔ واللہ تعالٰی اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابوالحسنین مفتی وسیم اختر المدنی

تاریخ اجراء:21 رجب المرجب 1443 ھ/23 فروری2022 ء