aik muahida mein do muahida karna

مذکورہ صورت میں ایک سال مکمل ہونے کے بعد مکمل رقم ادا نہ کرنے کی صورت میں آپکا اپنے بھائی سے کرایہ لینا جائز نہیں ہے، اسی طرح ایک سال میں قبضہ نہ دینے کی صورت میں آپکا کرایہ دینا بھی ناجائز ہے۔اس معاہدہ کے ناجائز ہونے کی وجہ یہ ہے کہ یہ صفقتان فی صفقۃ کی صورت ہے، یعنی ایک عقد میں دو معاہدہ کرنا ہے۔اور نبی کریم ﷺ نے صفقتان فی صفقۃ سے منع فرمایا۔چناچہ مسند احمد بن حنبل میں ہے: عَنْ عَبْدِ اللهِ بْنِ مَسْعُودٍ،قَالَ،نَهَى رَسُولُ اللهِ صَلَّى اللهُ عَلَيْهِ وَسَلَّمَ عَنْ صَفْقَتَيْنِ فِي صَفْقَةٍ وَاحِدَةٍ۔ ترجمہ:حضرت عبداللہ بن مسعود سے مروی ہے کہ رسول اللہ ﷺ نے ایک سودے میں دو سودے کرنے سے منع فرمایا۔( مسند احمد بن حنبل،ج 6 ص 324،حدیث نمبر 3783)

ہدایہ شرح بدایۃ المبتدی میں ہے: فيصير صفقتان في صفقة واحدة وهي منهي عنه۔ترجمہ:تو یہ ایک سودے میں دو سودے ہیں جو کہ (بحکم ِ حدیث )ممنوع ہے۔( ہدایہ شرح بدایۃ المبتدی، باب الاجارۃ الفاسدۃ ، ج3 ص 241)

آپ کے لئے بہتر یہ ہے کہ اپنے بھائی کو رقم ادا کرنے کے لئے کچھ وقت اور دے دیں ، یہ آپکے لئے صلہ رحمی کی صورت میں باعث اجر و ثواب ہوگا۔

واللہ تعالٰی اعلم بالصواب

کتبـــــــــــــــــــــــــــہ: محمد زوہیب رضا قادری

الجواب الصحیح:ابو الحسنین مفتی وسیم اختر المدنی

تاریخ اجراء:28 ربیع الثانی1441 ھ/26 دسمبر2019ء