zindagi mein hiba aur wirasat ki taqseem

بڑے بیٹے کی بیوی بچوں کا شوہر کے والد کی وراثت سے تقاضا جائز نہیں اور نہ ہی اس تقاضے پر انہیں وراثت سےحصہ دینا واجب ہے۔ بلکہ یہ جائیداد صرف ان ورثاء میں تقسیم ہوگی جومورث کی وفات کے وقت حیات تھے ، جس بیٹے کا انتقال پہلے ہوا ،اسکے ورثاء (بیوی، بچوں )کو اس وراثت سے کچھ حصہ نہ ملے گا۔کیونکہ مال وراثت ان لوگوں میں تقسیم ہوتا ہے جو مورث کی وفات کے وقت موجود ہوں۔الہدایۃ شرح بدایۃ المبتدی میں ہے:ويقسم ماله بين ورثته الموجودين في ذلك الوقت ومن مات قبل ذلك لم يرث منه :ترجمہ: اور میت کا مال اس کے ان ورثاء میں تقسیم ہوگا جو اسکی موت کے وقت موجود (زندہ) تھے اور جو ا س کی موت سے پہلے مرگئے وہ اس کے وارث نہیں ہونگے (لہذا ان میں وراثت تقسیم نہیں ہوگی)۔( الہدایۃ شرح بدایۃ المبتدی کتاب المفقود جلد 2ص 424)

یوں ہی البنایہ شرح الہدایہ میں اسی کے تحت ہے:وقسم ماله بين ورثته الموجودين في ذلك الوقت)أي وقت الحكم بالموت۔ترجمہ:اور اسکا مال اسکے ان ورثاء میں تقسیم کیا جائے گا جو اس(مورث)کی موت کے وقت موجود ہوں۔ (البنایہ شرح الہدایہ جلد 7ص367)

لیکن اگر دیگر ورثاء اس مرحوم بیٹے کے ورثاء کومالِ وراثت میں سے کچھ دیں تو یہ ان کی طرف سے احسان و صلہ رحمی کے طور پر ہوگا ، اور ایسے لوگ اللہ کریم کے پسندیدہ ہیں،قال اللہ تعالیٰ ان اللہ یحب المحسنین۔ترجمہ: اللہ تعالیٰ احسان کرنے والوں کو پسند فرماتا ہے ۔

البتہ موجودہ مال وراثت مرحوم کی بیوی اور موجودہ اولاد کے مابین ہوگی کیونکہ جو کچھ زندگی میں دیا وہ از قبیلِ وراثت نہیں بلکہ از قبیل ھبہ تھا۔اور موجودہ مال وراثت ہے جسکی تقسیم ورثاء کے مابین درج ذیل طریقے کے مطابق ہوگی کہ مالِ وراثت کے کل 64 حصے ہونگے جس میں سے بیوی کو 8 حصے، ہربیٹے کو الگ الگ 8 حصے اور ہر بیٹی کو الگ الگ 7 حصے کئے جائیں گے۔

مذکورہ تقسیم اللہ کے مقرر کردہ حصوں کے مطابق ہے،بیویوںکے بارے میں ارشاد ہے قال اللہ تعالیٰ:وَلَهُنَّ الرُّبُعُ مِمَّا تَرَكْتُمْ إِنْ لَمْ يَكُنْ لَكُمْ وَلَدٌ فَإِنْ كَانَ لَكُمْ وَلَدٌ فَلَهُنَّ الثُّمُنُ۔ترجمہ کنز الایمان :تمہارے ترکہ میں عورتوں کا چوتھائی ہے اگر تمہارے اولاد نہ ہو پھر اگر تمہارے اولاد ہو تو ان کا تمہارے ترکہ میں سے آٹھواں ۔

لڑکے لڑکیوں کے بارے میں ارشاد فرمایا:یُوصِیکُمُ اللَّہُ فِی أَوْلَادِکُمْ لِلذَّکَرِ مِثْلُ حَظِّ الْأُنْثَیَیْنِ۔ترجمہ کنز الایمان :اللہ تعالی تمہیں حکم دیتا ہے تمھاری اولاد کے بارے کہ بیٹے کا حصہ دو بیٹیوں برابر ہے۔

السراجی فی المیراث ص19میں ہے:ومع الابن للذکر مثل حظ الانثیین۔ترجمہ: اور للذکر مثل حظ الانثیین کے تحت بیٹی کو بیٹے کے حصے کا نصف ملے گا۔

واللہ تعالٰی اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابوالحسنین مفتی وسیم اختر المدنی

تاریخ اجراء:26 رجب المرجب 1445ھ/ 07 فروری 2024 ء