warasat ka masla do bete aur chaar betiyan

اگر معاملہ ایسا ہی ہے جیسا کہ سوال میں مذکور ہے تو جو بہنیں اس بات پر راضی ہیں کہ کہ ہمیں صرف پلاٹ دے دو باقی جائیداد میں سے ہمیں کچھ نہیں چاہیے، تو ان کا ایسا کرنا ازروئے شرع جائز ہے ،اسکو اصطلاح شرع میں تخارج کہتے ہیں ۔

شامی کتاب الفرائض باب المخارج جلد 6ص811 میں ہے،التخارج تَفَاعُلٌ مِنْ الْخُرُوجِ وَهُوَ فِي الِاصْطِلَاحِ تَصَالُحُ الْوَرَثَةِ عَلَى إخْرَاجِ بَعْضِهِمْ عَنْ الْمِيرَاثِ عَلَى شَيْءٍ مِنْ التَّرِكَةِ عَيْنٍ أَوْ دَيْنٍ:ترجمہ:تخارج باب تفاعل سے ہے خروج سے نکلا ہے اور اصطلاح شرع میں ورثاء میں سے بعض ورثاء کا کسی چیز پر صلح کرکے باقی وراثت سے خود کو دستبردار کرلینے کا نام تخارج ہے ۔

اور اگر یہ سب بہنیں بھائیو ں کے احسان کی وجہ سے ایسا کر رہی ہیں تو اس پر ثواب بھی ملے گا ، قال اللہ تعالیٰ هَلْ جَزَاءُ الْإِحْسَانِ إِلَّا الْإِحْسَانُ ، فَبِأَيِّ آلَاءِ رَبِّكُمَا تُكَذِّبَانِ ( الرحمان : 60،61)

ترجمہ: احسان کا بدلہ احسان ہی ہے ، توتم اے جن و انس اپنے رب کی کون کون سی نعمتوں کو جھٹلاؤ گے ۔

اور جو بہن اس بات پر راضی نہیں بلکہ اپنے حصے کی طلبگار ہے تو انکو انکا حصہ دینا واجب ہے کیونکہ میراث شریعت کا حق ہے ، کسی پر جبر اور زبردستی کے ذریعے معاف نہیں کرایا جاسکتا ۔

شامی باب کفارۃ الظہار ج3ص474 میں ہےلِأَنَّ الْإِرْثَ جَبْرِيٌّ لا یسقط بحال الا ان یکون الوارث راضیا :ترجمہ:کیونکہ وراثت ایک جبری چیز ہے کسی صورت میں ساقط نہیں ہوسکتی مگر جبکہ وارث خود راضہ ہو تو اسکے حق میں سے ساقط ہوجائے گی ۔

لہذا اب بہنوں کو وہ پلاٹ دے کر بقیہ وراثت کے کل 5 حصے کیے جائیں گے جس میں سے ایک حصہ اس بہن کو ملے گا ، جو راضی نہیں ہے اور دو دو حصہ ہر بھائی کو ملیں گے ۔

لیکن یاد رہےکہ ان تین بہنوں کے علاوہ جو پلاٹ لینے پر راضی ہوچکی ہیں اب کسی بھی بھائی اور بہن کا پلاٹ میں کوئی حصہ باقی نہیں رہا ، اب باقی ایک بہن اور دو بھائیوں کو جو ملے گا وہ زمین اور گھر میں سے ملے گا۔

اسکا طریقہ یہ ہے کہ کل جائیداد یعنی گھر اور زمینوں میں سے ہر ایک کو پانچ حصوں میں تقسیم کیا جائے اور ایک حصہ بہن کو دے دیا جائے ۔ لیکن اگر گھر یا زمین میں سے حصہ یعنی اس گھر اور زمین میں جگہ دینے کے لئے کوئی ایک بھی راضی نہ ہو تو اب طریقہ یہ ہے کہ کل جائیداد بشمول گھر اور زمینیں انکی قیمت لگوائی جائے اور اس قیمت کو پانچ پر تقسیم کیاجائے جو جواب آئے وہ اس بہن کا حصہ ہے اسکو دے دیا جائےجو اپنے حصے کا تقاضا کررہی ہے۔

واللہ اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح: مفتی محمد عمران شامی