warasat ka masla aik biwi chaar bete do beti

اگر معاملہ ایسا ہی ہے جیسا کہ سوال میں مذکور اور تو داد کی وفات کے بعد مکان کا مالک دادی کو بنا دیا گیا تھا اور داد کی جائیداد تقسیم نہیں کی گئی تھی لہذا اب دادی مکان کی مالک تھیں ، لیکن آپ کے والد کا انتقال دادی کے انتقال سے پہلے ہوا اس لیے آپ کے والد کا دادی کی جائیدد میں کوئی حصہ نہیں ہوگا، کیونکہ وراثت میں سے حصہ میت کے زندہ ورثاء کو ملتا ہے ، جب کے آپکے والد اس وقت حیات نہیں تھے ، اور اس لیے بھی کہ میراث یعنی وراثت کا اصول ہے کہ قریبی رشتے دار کی موجودگی میں دور والا رشتہ دار کو نہیں ملتا ، لھذا جب اس میت کی اولاد یعنی سگے بیٹے موجود ہیں ان کی موجودگی میں پوتے یا پوتی کو اسکی وراثت سے کچھ حصہ نہیں ملے گا۔

چناچہ السراجی فی المیراث ص36میں ہے''اولاہم بالمیراث جزء المیت ای البنون ثم بنوہم وان سفلوا'' (السراجی فی المیراث ص36)ترجمہ: میت کی وراثت کے زیادہ حقدار میت کا جزء یعنی بیٹے ہیں ،(اگر بیٹے نہ ہوںتو)اسکے بعد پوتے ۔

تنویرالابصار مع الدرالمختار کتاب الفرائض باب العصبات جلد6ص774پر ہے ''(وَیُقَدَّمُ الْأَقْرَبُ فَالْأَقْرَبُ مِنْہُمْ) بِہَذَا التَّرْتِیبِ فَیُقَدَّمُ جُزْء ُ الْمَیِّتِ (کَالِابْنِ ثُمَّ ابْنِہِ وَإِنْ سَفَلَ'':ترجمہ: اور (میت کے رشتے داروں میں سے) قریب کے رشتے دار کو وراثت دینے میں مقدم کیاجائے گا پھر جو اسکے بعد زیادہ قریب ہو اسکو مقدم کیاجائے گا ،اسی ترتیب سے آگے تک لہذا میت کے جزء یعنی بیٹے کووراثت دینے میں مقدم کیا جائے گا ۔ (اگر بیٹا نہ ہوتو)پھر اسکا بیٹے(یعنی پوتے کو )وراثت دینے میں مقدم کیا جائے گا۔

لہذا اب دادی کی وفات کے وقت جو جو لوگ موجود تھے وراثت ان میں تقسیم ہوجائے گی ، اس طرح کہ کل وراثت کے 112 حصے کیے جائیں گے جس میں ہے ہر بیٹے کو یعنی نثار احمد، نور احمد اور فرید احمد کو 30،30 حصے ملیں گے اور بیٹی رخسانہ بیگم کو 15 حصے اور رضوانہ بیگم کے شوہر زاہد احمد کو 7 حصے ملیں گے ۔ اس طرح کل وراثت کی تقسیم ہوگی ۔

واللہ اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح: مفتی محمد عمران شامی