السلام علیکم

عرض یہ ہے کہ ہمارے بزرگ میانوالی سے تقریبا 80 سال قبل کراچی آکر آباد ہوئے ،اس وقت کراچی میں کوئی لیز وغیرہ نہیں ہوتی تھی ، بس جس جگہ پر جو بیٹھ گیا وہ جگہ اسی کی سمجھی جاتی تھی ،ہمارے بزرگوں نے یہاں مسجد کے لیے بھی ایک جگہ مختص کردی تھی اور اس کے گرد نشانات لگا دئیے کہ یہاں ہم مسجد بنائیں گے۔جب مسجد کی تعمیر شروع ہوئی تو مسجد کے ایک حصہ پر مکانات بنادئیے گئے تاکہان کے کرائے سے مسجد کے اخراجات پورے کیے جا سکیں، لیکن اب یہ مکانات خستہ حالت کو پہنچ چکے ہیں۔مسجد کا وضو خانہ جو کہ مسجد کی بنیادوں سے متصل بنا ہوا ہے ، اور پانی کے مستقل بہاؤ کی وجہ سے مسجد کی بنیادوں کو کمزور کررہا ہے۔ مسجد کے وہ ستون جوکہ وضو خانہ سے متصل ہیں کئی مرتبہ مرمت کروائے جا چکے ہیں ، مسجد انتظامیہ نے سوچا کہ ان کرائے کے مکانات کو گرا کر پختہ مکانات تعمیر کیے جائیں اور ان مکانات والے حصہ میں گراؤنڈ فلور پر کچھ دوکانیں بنادی جائیں جن سے آنے والا کرایہ مسجد کے اخراجات کو پورا کرنے کے لیے استعمال ہوگا۔ اور کچھ حصہ پر مسجد کا وضو خانہ ، استنجاء خانہ تعمیر کرایا جائے اور اس پلاٹ کے اوپر والی منزلوں میں کرائے کے مکانات تعمیر کرالیے جائیں ۔

آپ سے گزارش ہے کہ یہ ارشاد فرمادیں کہ کیا کرائے کے مکانات والے حصہ میں گراؤنڈ فلور پر ہم مسجد کا وضو خانہ اور استنجاء خانہ تعمیر کرواسکتے ہیں؟

سائل: محمد صدیق عطاری