berun-e-mulk ka bank account banwa kar us se faida lena

صورت مستفسرہ کا حکم یہ ہے کہ محض اس مقصد کے لئے اکاؤنٹ کھلوانا اور مذکورہ سہولت لینا اور دینا ہر دو ناجائز ہے، کیونکہ اس میں سود کا معنٰی موجود ہےاور بحکمِ قرآن سود ناجائز و حرام ہے۔

تفصیل:

بے شک لوگ اس کے اکاؤنٹ میں جو رقم رکھوائیں گے وہ ضرور واپسی کے تقاضے کے ساتھ ہی رکھوائیں گے تو بے شک یہ قرض ہوئی کہ اسی لیے دی گئی تاکہ بعد ازاں اسکا تقاضا کیا جائے پھر اس پر اس شخص کا 7 یا 10 فیصد رقم کاٹ لینا نفع ہے سو یہ قرض پر نفع کی صورت ہوئی اور بے شک قرض پر نفع صریح سود ہے جو کہ ناجائز و حرام ہے پھر جس طرح سود لینا ناجائز و حرام ہے یونہی سود دینا اور اسکا عقد کرنا بھی ناجائز و حرام ہی ہے۔ جیساکہ حدیث مبارکہ میں ہے: "كُلُّ قَرْضٍ جَرَّ مَنْفَعَةً، فَهُوَ رِبًا"ترجمہ:ہر وہ قرضہ جو نفع دے وہ سود ہے ۔( مصنف ابن ابی شیبہ ،باب من کرہ کل قرض جر منفعۃ، رقم :20690)

خلاصہ یہ ہے کہ مذکورہاکاؤنٹ کھلوانا اور مذکورہ سہولت لینا اور دینا ہر دو ناجائز وحرام ہے۔

واللہ تعالٰی اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابو الحسنین مفتی وسیم اختر المدنی

تاریخ اجراء:11 جمادی الثانی 1446ھ/ 14 دسمبر 2024 ء