warasat ka masla bewa do betay paanch betiyan

اگر معاملہ ایسا ہی ہے جیسا سوال میں مذکور ہوا اور انکا ان کے علاوہ کوئی اور وارث نہیں ہے تو انکی جو بیٹی ان سے پہلے وفات پاگئیں انکو جمیل صاحب کی وراثت سے کچھ نہیں ملے گا ، اور اسی طرح جمیل صاحب کے بھائیوں کو بھی کچھ نہیں ملے گا، کیونکہ میت کی اولاد کی موجودگی میں اسکے بھائیوں کو کچھ نہیں ملتا،

چناچہ سراجی فی المیراث ص36میں ہے''اولاہم بالمیراث جزء المیت ای البنون ثم اصلہ ای الاب ثم جزء ابیہ الاخوۃ'' ترجمہ: میت کی وراثت کے زےادہ حقدار میت کا جزء یعنی بیٹا ہے ،اس کے بعد باپ کا زیادۃ حق ہے اسکے بعد میت کے بھائی کا ۔

تنویرالابصار مع الدرالمختار کتاب الفرائض باب العصبات جلد6ص774پر ہے ''(وَیُقَدَّمُ الْأَقْرَبُ فَالْأَقْرَبُ مِنْہُمْ) بِہَذَا التَّرْتِیبِ فَیُقَدَّمُ جُزْء ُ الْمَیِّتَِ ثم اصلہ الاب ثم جزء ابیہ الاخ'':ترجمہ: اور (میت کے رشتے داروں میں سے) قریب کے رشتے دار کو وراثت دینے میں مقدم کیاجائے گا پھر جو اسکے بعد زیادہ قریب ہو اسکو مقدم کیاجائے گا ،اسی ترتیب سے آگے تک لہذا میت کے جزء یعنی بیٹے کووراثت دینے میں مقدم کیا جائے گا پھر اسکے باپ کو پھر اسکے بھائی کو۔

اور مرحوم نے انتقال سے پہلے کہا تھا کہ میری بیوی کی قبر کا خرچہ بھی میری وراثت سے دیا جائے یہ وصیت ہے اور یہ وصیت انکے حق میں نافذ نہیں ہوگی یعنی انکی تدفین کا خرچہ ترکے سے نہیں دیا جائے گا کیونکہ یان کی بیوی انکی وارث ہیں اور وارث کو صرف اسکا فرض حصہ ملتا ہے اسکے حق میں وصیت نافذ نہیں ہوتی۔

بدائع الصنائع کتاب الوصیہ فصل فی رکن الوصیۃ ج6ص424میں ہے :وَفِی الْحَدِیثِ مَا یَدُلُّ عَلَیْہِ، فَإِنَّہُ - عَلَیْہِ الصَّلَاۃُ وَالسَّلَامُ - قَالَ: إنَّ اللَّہَ تَبَارَکَ وَتَعَالَی أَعْطَی کُلَّ ذِی حَقٍّ حَقَّہُ، فَلَا وَصِیَّۃَ لِوَارِثٍ وَقَوْلُہُ کُلَّ ذِی حَقٍّ حَقَّہُ أَیْ: کُلَّ حَقِّہِ فَقَدْ أَشَارَ - عَلَیْہِ الصَّلَاۃُ وَالسَّلَامُ - إلَی أَنَّ الْمِیرَاثَ الَّذِی أُعْطِیَ لِلْوَارِثِ کُلُّ حَقِّہِ، فَیَدُلُّ عَلَی ارْتِفَاعِ الْوَصِیَّۃِ، وَتَحَوُّلِ حَقِّہِ مِنْ الْوَصِیَّۃِ إلَی الْمِیرَاثِ وَإِذَا تَحَوَّلَ فَلَا یَبْقَی لَہُ حَقٌّ لَہُ فِی الْوَصِیَّۃِ:ترجمہ: اور حدیث میں اس بات کی دلیل موجود ہے کیونکہ آپ علیہ الصلوۃ والسلام نے ارشاد فرمایا کہ اللہ تبارک وتعالیٰ نے ہر وارث کو اسکا حق دے دیا ہے لہذا وارث کے لئے وصیت نہیں ہے، اور آپ علیہ السلام کا یہ کہنا (ہر وارث کو اسکا حق دے دیا ہے) اس بات کی طرف اشارہ ہے کہ وارث کو جو وراثت دی جاتی ہے اس کا بس وہی ہے اور یہ (وارث کے حق میں وصیت کے نافذ نہ ہونے کی اور اسکا حق وصیت سے وراثت کی طرف پھرنے کی دلیل ہے اور جب اسکا حق وراثت کی طرف پھر گیا تو اس کا وصیت میں کوئی حق باقی نہ رہا۔

اب میت کے جو ورثاء باقی ہیں ان میں تقسیم اس طرح ہوگی کہ کل مال کے 64حصے کئے جائیں گے جس میں سے میت کی زوجہ کو 8حصے ملیں گے قال اللہ تعالیٰ'' ولہن الربع مماترکتم ان لم یکن لکم ولد فان کان لکم ولد فلہن الثمن مما ترکتم( النساء:12)

ترجمہ: اورتم نے جو کچھ چھوڑا اس میں بیویوں کا چوتھا حصہ ہے جبکہ تمہاری کوئی اولاد نہ ہو ،اور اگر تمہاری اولاد ہو توجو تم نے چھوڑا اس میں سے انکا آٹھواں حصہ ہے ۔

اور ہر بیٹی کو 7,7حصے ملیں گے اور ہر بیٹے کو بیٹیوں سے دگنا ملے گا۔ قال اﷲ تعالیٰ للذکر مثل حظ لانثیین(النساء : 11) ترجمہ : مرد کے لئے عورت کے حصہ سے دگنا ہے۔

سراجی فی المیراث ص25پر ہے ومع الابن للذکر مثل حظ الانثیین وھو یعصبہن:ترجمہ: اور بیٹی کو بیٹے کے ہوتے ہوئے ٰ للذکر مثل حظ لانثیین( یعنی مرد کے لئے عورت کے حصہ سے دگنا ہے) کے تحت حصہ ملے گا،یعنی بیٹے کو بیٹی سے دگنا ملیگا۔وہ انکو عصبہ بنادے گا۔

خلاصہ یہ ہے کہ کہ کل مال کے 64حصے کئے جائیں گے جس میں سے میت کی زوجہ کو 8حصے ملیں گے ،اور ہر بیٹی کو 7,7حصے ملیں گے اور ہر بیٹے کو بیٹیوں سے دگنایعنی 14,14حصے ملیں گے۔

واللہ اعلم بالصواب

کتبـــــــــــــــــــــــــــہ:محمد زوہیب رضا قادری

الجواب الصحیح:ابوالحسنین مفتی وسیم اختر المدنی