سب سے پہلے یہ بات جان لیں کہ قربانی کی کھالوں کو زکوۃ تصور نہیں کیا جاسکتا کیوں کہ قربانی کی کھال کا صدقہ کرنا،صدقات نافلہ میں سے ہے یعنی اسکا صدقہ کرنا واجب نہیں ہے بلکہ قربانی کرنے والا شخص چاہے تو قربانی کی کھال کو باقی رکھ کر اپنے استعمال میں لائے اور چاہے تو کسی مصرف ِ خیر میں دے دے، البتہ قربانی کی کھال بیچ کر اسکی رقم استعمال میں نہیں لاسکتا اور نہ ہی کھال قصاب کو بطور اجرت کے دے سکتا ہے۔ جبکہ زکوۃ صدقات واجبہ میں سے ہے ۔درمختار میں ہے:(وَيَتَصَدَّقُ بِجِلْدِهَا أَوْ يَعْمَلُ مِنْهُ نَحْوَ غِرْبَالٍ وَجِرَابٍ أَوْ يُبَدِّلَهُ بِمَا يَنْتَفِعُ بِهِ بَاقِيًالَا بِمُسْتَهْلَكٍ كَخَلٍّ وَلَحْمٍ وَنَحْوِهِ) كَدَرَاهِمَ وَلَا يُعْطَى أَجْرُ الْجَزَّارِ مِنْهَا) (ملخصا).ترجمہ:اور قربانی کی کھال صدقہ کرے یا اس کو اپنے کام میں لائے جیسے چھلنی،جراب وغیرہ بنالے، یا اسکو چیز سے بدل دےجس کو باقی رکھتے ہوئے

اس سے نفع اٹھایا جائے( جیسے کتاب کی جلد)نہ کہ وہ ہلاک ہونے والی ہو جیسےسرکہ،گوشت اور پیسے وغیرہ، اور کھال قصاب کو اجرت میں نہ دے۔(الدر المختار شرح تنویر الابصار کتاب الاضحیۃ ،جلد 6 ص 328)

اس کے بعد آپ کے سوالوں کا جواب یہ ہے کہ :

1:چرمہائے قربانی سے حاصل ہونے والی رقم کو ان طلباء و طالبات کیلیے بطور عطیہ انکے تعلیمی اخراجات میں استعمال کے لیے دیا جاسکتا ہے، کیوں کہ یہ بھی مصرفِ خیر سے ہے۔

2:اسی طرح چرمہائے قربانی سے حاصل ہونے والی رقم کو ان طلباء و طالبات کو قرض حسنہ کے طور پر دے سکتے ہیں ،اور واپس ادائیگی کے بعد چرم قربانی اکاؤنٹ میں جمع کرکے دوبارہ اسی مد میں استعمال کی جا سکتی ہے، اس میں بھی کوئی حرج نہیں ہے۔

واللہ تعالٰی اعلم بالصواب

کتبـــــــــــــــــــــــــــــه:محمدزوہيب رضاقادري

الجـــــواب صحــــيـح:ابو الحسنينن مفتي وسيم اخترالمدني

تاريخ اجراء:14 جمادی الثانی 1440 ھ/20 فروری 2019 ء